टीम मंगळवेढा टाईम्स।
‘एमपीएससी’ आणि ‘गेट’ परीक्षेमुळे विद्यापीठाने परीक्षा पुढे ढकलावी, या मागणीसाठी सोमवारी विद्यार्थ्यांनी विद्यापीठासमोर ठिय्या आंदोलन केले.
याची दखल घेत विद्यापीठ प्रशासनाने २० जानेवारीऐवजी परीक्षा २३ जानेवारीपासून सुरु करण्याचा निर्णय घेतला आहे.
पुण्यश्लोक अहिल्यादेवी होळकर सोलापूर विद्यापीठाने बीए, बीकॉम, बीएससी, बीबीए, बीसीए, बीएड, बीपीएड, या अभ्यासक्रमाची प्रथम वर्षाची सत्र परीक्षा २० जानेवारीपासून घेण्याचा निर्णय घेतला होता.
या विद्यार्थ्यांचे सत्र ऑगस्ट २०२२ रोजी सुरु झाले असून त्यांचा संपूर्ण सिलॅबस शिकवून पूर्ण झाला आहे. परंतु, विद्यार्थ्यांसह अखिल भारतीय विद्यार्थी परिषदेने रविवारी विद्यापीठासमोर आंदोलन केले.
यावेळी संघटनेचे पश्चिम महाराष्ट्राचे सहमंत्री रोहित राऊत, सचिन पारवे, आदित्य मुस्के, पार्थ तेरकर, प्रशांत मदकंटे आदी उपस्थित होते.
आंदोलनामुळे विद्यापीठाने प्रथम वर्षाच्या विद्यार्थ्यांची परीक्षा २३ जानेवारीपासून घेण्याचा निर्णय घेतला. तसेच नवीन बदलानुसार आता बीए, बीकॉम, बीएससी, बीबीए, बीसीए, बीएड, बीपीएड अभ्यासक्रमाच्या तृतीय तथा अंतिम वर्षाची परीक्षा २७ जानेवारीपासून सुरु होणार आहेत.
अभियांत्रिकीची परीक्षा २५ जानेवारीपासून
‘गेट’ परीक्षेमुळे बी-टेक तृतीय वर्ष व अंतिम वर्षाची परीक्षा २० जानेवारीऐवजी पुढे ढकलावी, अशी मागणी यावेळी आंदोलक विद्यार्थ्यांनी केली होती.
त्यांची मागणी विचारात घेऊन विद्यापीठाने आता या विद्यार्थ्यांची सत्र परीक्षा २५ जानेवारीपासून सुरु करण्याचा निर्णय घेतला आहे.
तसेच महाराष्ट्र राज्य लोकसेवा आयोगाची (एमपीएससी) परीक्षा २१ ते २४ जानेवारी दरम्यान होणार असल्याने या काळात विद्यापीठाची परीक्षा होणार नाही, असेही विद्यापीठाने स्पष्ट केले. पूर्वीच्या वेळापत्रकात विद्यापीठाने तसा बदल केलेला आहे.
फेब्रुवारीत परीक्षा घेण्याची मागणी, पण…
अभियांत्रिकी विद्यार्थ्यांची ‘गेट’ परीक्षा झाल्यानंतर साधारणत: १३ फेब्रुवारीनंतर विद्यापीठाने सत्र परीक्षा सुरु करावी, अशी मागणी आंदोलक विद्यार्थ्यांनी यावेळी केली होती.
पण, त्यामुळे सर्वच सत्र परीक्षांचे वेळापत्रक कोलमडून विद्यार्थ्यांचे मोठे शैक्षणिक नुकसान होईल अशी बाजू विद्यापीठाच्या अधिकाऱ्यांनी समजावून सांगितली. त्यानंतर विद्यापीठाने बी-टेकच्या तृतीय व अंतिम वर्षाच्या विद्यार्थ्यांची परीक्षा पाच दिवस परीक्षा पुढे ढकलण्याचा निर्णय घेतला.(स्रोत; सकाळ)
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज