टीम मंगळवेढा टाईम्स। सोलापूर:
संपूर्ण सोलापूर जिल्ह्याचे लक्ष लागून राहिलेल्या स्थानिक स्वराज्य संस्था विधानपरिषद निवडणुकीच्या पार्श्वभूमीवर जिल्ह्यातील राजकीय वातावरण कमालीचे तापले आहे.
भारतीय जनता पार्टीकडून उमेदवारीसाठी माजी आमदार प्रशांत परिचारक यांचे नाव जवळजवळ निश्चित झाल्याची जोरदार चर्चा राजकीय वर्तुळात आहे.
मात्र, पक्षाकडून अद्याप अधिकृत घोषणा होणे बाकी असतानाच, बार्शीचे माजी आमदार राजेंद्र राऊत यांनी विधान परिषदेसाठीचा उमेदवारी अर्ज नेल्याने या निवडणुकीतील सस्पेन्स कमालीचा वाढला आहे.
२०१७ विरुद्ध २०२६: सोलापुरात भाजप मजबूत स्थितीत
२०१७ मध्ये जेव्हा प्रशांत परिचारक रिंगणात होते, तेव्हा त्यांच्याविरोधात राष्ट्रवादी काँग्रेसचे माजी आमदार दीपक साळुंखे पाटील यांचे तगडे आव्हान होते. त्यावेळी पुरेसे संख्याबळ पाठीशी नसतानाही, तत्कालीन पालकमंत्री विजयकुमार देशमुख, जिल्हा परिषद अध्यक्ष संजयमामा शिंदे आणि सुरेश हसापुरे या सर्व नेत्यांनी मोठी ताकद लावत परिचारक यांना आमदार करण्यात यश मिळवले होते.
२०१७ च्या तुलनेत २०२६ मधील राजकीय समीकरणे पूर्णपणे बदलली आहेत. विद्यमान पालकमंत्री जयकुमार गोरे यांच्या नेतृत्वाखाली सोलापूर शहर आणि जिल्ह्यात भाजपने जोरदार मुसंडी मारली असून, पक्षाकडे तब्बल ३०० हून अधिक मतदारांचे भक्कम संख्याबळ आहे. यामुळे भाजप सध्या अत्यंत मजबूत स्थितीत दिसून येत आहे.
राजेंद्र राऊत यांच्या नावाचीही जोरदार चर्चा
भाजपच्या गोटातून प्रशांत परिचारक यांच्यासोबतच इतरही काही नावांची जोरदार चर्चा सुरू आहे, माजी आमदार राजेंद्र राऊत यांनी आपल्या बार्शी तालुक्यातील सहा जिल्हा परिषद आणि बारा पंचायत समिती अशा सर्वच्या सर्व १८ जागांवर भारतीय जनता पार्टीचे उमेदवार निवडून आणल्याने त्यांचे नाव सध्या आघाडीवर आहे. त्यातच त्यांनी अर्ज नेल्याने राजकीय हालचालींना वेग आला आहे.
प्रशांत परिचारक यांचे पारडे का जड?
प्रशांत परिचारक यांना उमेदवारी मिळण्यामागे त्यांची पक्षाप्रती असलेली निष्ठा आणि पडद्यामागील काम महत्त्वाचे मानले जात आहे.
पोटनिवडणुकीतील कामगिरी: २०२१ च्या पंढरपूर पोटनिवडणुकीत समाधान अवताडे यांना निवडून आणण्यासाठी परिचारक यांनी प्रचंड कष्ट घेतले होते.
२०२४ मध्ये सिंहाचा वाटा: २०२४ च्या निवडणुकीतही समाधान आवताडे यांच्या विजयात त्यांनी महत्त्वाची भूमिका बजावली.
निःस्वार्थी भूमिका: जिल्हा परिषद निवडणुकीनंतर किंवा पंढरपूरच्या घडामोडींनंतर त्यांनी पक्षाकडे कोणत्याही पदाची मागणी केली नाही. त्यामुळेच ते या जागेसाठी सर्वात ‘खरे दावेदार’ मानले जात आहेत.
प्रशांत परिचारक यांचे नाव आघाडीवर आणि जवळपास निश्चित मानले जात असले, तरी भाजपच्या “धक्कातंत्राचा” इतिहास पाहता ऐनवेळी एखादे अनपेक्षित नाव समोर येऊ शकते, अशीही दबकी चर्चा सोलापूरच्या राजकीय वर्तुळात रंगली आहे. आता सर्वांचे लक्ष दिल्ली आणि मुंबईतून होणाऱ्या अधिकृत घोषणेकडे लागले आहे.
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स”च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
