टीम मंगळवेढा टाईम्स ।
अनैतिक संबंधात आड येणाऱ्या पतीचा पत्नीने दोरीने गळा आवळून खून केला तसेच पती घरात नसल्याचे सांगत पुरावा नष्ट करण्याचा प्रयत्न केला. ही घटना सांगोला तालुक्यात गावडेवाडी हंगिरगे येथे घडली आहे.
सोपान भीमराव गावडे (३९) असे मृताचे नाव असून पमाबाई सोपान गावडे (वय २४, रा. गावडेवाडी हंगिरगे) असे पत्नीचे नाव आहे. याबाबत दत्तात्रय बाळू गावडे (रा.गावडेवाडी) यांनी फिर्याद दिली.
गावडेवाडी हंगिरगे येथील सोपान भीमराव गावडे यांचे पहिले लग्न झाले होते. परंतु पहिल्या पत्नीचा घटस्फोट झाला होता. सोपान गावडे यांनी सहा वर्षांपूर्वी मारोळी (ता. मंगळवेढा) येथील पमाबाई हिच्या सोबत दुसरा विवाह केला होता. सोपान हे मजुरी करून कुटुंबाची उपजीविका भागवित होते.
पोलीस सूत्राकडील माहितीनुसार, पमाबाईचादेखील हा दुसरा विवाह होता. ती पती सोपान याच्यासमवेत वारंवार तक्रार करून माहेरी निघून जायची. घरी त्यास जेवण देत नव्हती. सोपान हा सरळमार्गी असूनही ती सतत वाद घालून त्रास देत होती.
तिची वागणूकही वाईट होती. गावातील किराणा दुकानदार मारुती चौगुले याच्याशी तिचे अनैतिक संबंध होते. पती सोपान हा त्याला विरोध करीत होता. त्यामुळे ती पतीवर चिडून होती.
गुरुवारी मध्यरात्री १.१५ च्या सुमारास घरी पती सोपान गावडे याचा पिवळ्या रंगाच्या लेसने गळा आवळून खून केला. या झटापटीत सोपानच्या अंगावर किरकोळ जखमा झाल्याने रक्त आले. गुप्तांगावर व डोक्याच्या मागील बाजूस जखम झाल्याचे पाेलिसांच्या निदर्शनास आले.
तसेच पमाबाईची एक चप्पल सोपानच्या छातीजवळ तर दुसरी पायाजवळ आढळली. त्यामुळे खुनाचा संशय बळावला. या घटनेनंतर सुभाष वाघ यांनी सांगोला पोलिसांना याची माहिती दिली.
घटनेदिवशी गुरुवारी मध्यरात्री १.३९ च्या सुमारास २०० फूट अंतरावर शेजारी राहणारे मंगल लक्ष्मण मेटकरी व शोभा पांडुरंग गावडे यांना सोपान गावडे यांच्या घरातून लहान मुलीच्या रडण्याचा, पाय आपटण्याचा व घशाचा आवाज येत होता.
शेजाऱ्यांना संशय आल्याने पहाटे ते सोपानच्या घरी डोकावले. पमाबाईस सोपान कोठे आहे? अशी विचारणा केली असता खुनाचा प्रकार उघडकीस आला.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज