टीम मंगळवेढा टाईम्स ।
मंगळवेढा तालुक्यातील नंदेश्वर ग्रामपंचायत निवडणुकीसाठी सध्या मोठ्या प्रमाणात अर्ज भरण्यास सुरवात झालेली आहे. तरी नंदेश्वर ग्रामपंचायत निवडणूक बिनविरोध करण्यासाठी एका बाजूने दुसऱ्या फळीचे मोठ्या प्रमाणात प्रयत्न सुरू असल्याचे चित्र पाहावयास मिळत आहे.
नंदेश्वर ग्रामपंचायत निवडणूक बिनविरोध झाल्यास आमदार गोपीचंद पडळकर यांच्याकडून अत्याधुनिक सर्व सुखसोयींनी युक्त सुसज्ज अशी रुग्णवाहिका भेट देणार असल्याचे त्यांचे समर्थक मल्हार महासंघाचे मंगळवेढा तालुकाध्यक्ष अंकुश गरंडे यांनी सांगितले.
नंदेश्वर गावामध्ये धनगर समाजाचे मोठ्या प्रमाणात मताधिक्य असून, या गावामध्ये आपल्याच भावकी व पै – पाहुण्यांमध्येच निवडणुकीसाठी रस्सीखेच लागल्याचे दिसून येते. त्यामुळे आमदार गोपीचंद पडळकर यांच्या समर्थकांनी पुढे येऊन ही निवडणूक बिनविरोध करण्यासाठी पुढाकार घेतलेला आहे.
मात्र, दुसऱ्या बाजूने मोठ्या प्रमाणात अर्ज भरण्यासही सुरवात झालेली आहे. ही निवडणूक बिनविरोध करून आपापसातील वाद, भांडणे व तंटे मिटवून घेऊन आपल्या गावाच्या विकासासाठी मोठ्या संख्येने आपणच एकत्रित येऊन पुढाकार घ्यावा व ही निवडणूक बिनविरोध करावी,
तसेच नंदेश्वर हे गाव तीर्थक्षेत्र म्हणून नावारूपाला पुढे आणण्यासाठी आपले योगदान द्या व त्यासाठी कोणत्याही प्रकारचा निधी लागला तर मी माझ्या आमदार फंडातून देईन, असा संदेश गोपीचंद पडळकर यांनी त्यांच्या समर्थकांमार्फत नंदेश्वर ग्रामस्थांना दिला आहे.(सकाळ)
नंदेश्वर ग्रामपंचायत निवडणूक बिनविरोध करण्यासाठी आमचे मोठ्या प्रमाणात प्रयत्न सुरू आहेत. आणि ही निवडणूक बिनविरोध झाल्यास आमदार गोपीचंद पडळकर यांच्याकडून सुसज्ज अशी रुग्णवाहिका गावास भेट देण्यात येणार आहे.– अंकुश गरंडे,
तालुकाध्यक्ष, मल्हार महासंघ, मंगळवेढा
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज