शाळेत ‘तालिबानी’ कृत्य! शिक्षकाने लाकडी पट्टी अन् बुक्क्यांनी मुलाला तुडवले, २६ दिवसांनंतर अखेर गुन्हा दाखल; सोलापूर जिल्ह्यातील घटना

मंगळवेढा टाईम्स न्युज नेटवर्किंग ।

शाळेचा अभ्यास केला नाही या कारणावरून अवघ्या आठ वर्षांच्या चिमुकल्याला शिक्षकाने लाकडी पट्टीने आणि बुक्क्यांनी डोक्यावर व पाठीवर अमानुष मारहाण केल्याची घटना सोलापुरातील श्री दिगंबर जैन गुरुकुल प्राथमिक शाळेत घडली आहे.

याप्रकरणी विद्यार्थ्यांचे नातेवाईक सिद्धार्थ (रा. तुळजापूर, सध्या सोलापूर) यांनी शनिवारी फौजदार चावडी पोलिसांत फिर्याद दिली. याप्रकरणी वर्गशिक्षक प्रतीक प्रवीणकुमार मेहता याच्याविरोधात बाल न्याय (काळजी व संरक्षण) कायद्याच्या कलम ७५ अंतर्गत गुन्हा नोंदविला आहे.

काही दिवसांपूर्वीच तामिळनाडूमध्ये एका शिक्षकाच्या मारहाणीत विद्यार्थ्यांचा मृत्यू झाल्याची काळीज पिळवटून टाकणारी घटना घडली होती. हे कृत्य सीसीटीव्हीत कैद झाल्यानंतर देशभरातून तीव्र संताप व्यक्त होत होता. ती घटना ताजी असतानाच आता सोलापुरातही असाच प्रकार समोर आला.

दि.२८ जुलै रोजी सकाळी वर्गात अभ्यास तपासणी सुरू असताना पीडित विद्यार्थ्याने गृहपाठ केला नसल्याचे समोर आले. यावरून वर्गशिक्षक प्रतीक मेहताने बालकाचे वय लहान असल्याचे ठाऊक असूनही त्याला लाकडी पट्टीने डोक्यावर, पाठीवर मारहाण केली तसेच हाताने व बुक्क्यांनी मारले, असे फिर्यादीत म्हटले आहे. या प्रकरणी पोलिस हवालदार घुगे तपास करीत आहेत.

मुलांमध्ये भीती बसेल…

आठ वर्षाचे मूल अजून भावनिकदृष्ट्या आणि सामाजिकदृष्ट्या विकसित होत असते. वारंवार किंवा कठोर शिक्षा केल्यामुळे मुलाच्या मनात भीती, चिंता, कमी आत्मविश्वास किंवा ‘भी चुकीचा, वाईट आहे’ अशी भावना निर्माण होऊ शकते. त्यामुळे शिक्षेपेक्षा सकारात्मक पद्धतीने समजावून सांगणे अधिक उपयुक्त ठरू शकते.

मुलाकडून चूक झाली तर त्याच्या व्यक्तिमत्त्वावर टीका न करता, फक्त चुकीच्या वर्तनाबद्दल शांतपणे समजावून सांगावे. चांगले वर्तन केल्यावर त्याचे कौतुक आणि प्रोत्साहन करावे. स्पष्ट नियम आणि सातत्यपूर्ण मार्गदर्शन ठेवावे.

शिक्षक आणि मुलामध्ये विश्वासाचे नाते असणे खूप महत्त्वाचे आहे. आपण मुलाच्या शिस्तीबरोबरच त्याच्या भावनिक आरोग्याचाही विचार करा, असे मत मानसोपचार तज्ज्ञ संध्या काळे यांनी व्यक्त केले.(स्रोत:लोकमत)

अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262

“मंगळवेढा टाईम्स“च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.

मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.

बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.

बातम्या सर्वप्रथम जाणून घेण्याकरिता लाईक करा आमचे फेसबुक पेज