मंगळवेढा टाईम्स ऑनलाईन । सोलापुरातील कोरोना रुग्ण व मृत्यू संख्या वाढतेय; पण नागरिकांनी घाबरू नये. सर्वांना विश्वासात घेऊन पाच दिवस अगोदर सूचित करूनच लॉकडाऊन जाहीर करू. तत्पूर्वी, कोरोना रुग्ण व मृत्यू संख्या रोखण्यासाठीचा अॅक्शन प्लॅन तयार करूनच लॉकडाऊन जाहीर करू, असे पालकमंत्री दत्तात्रय भरणे यांनी सांगितले. In Solapur city, we will announce the lockdown five days in advance , Guardian Minister Dattatraya bharane
शनिवारी सोलापूर दौर्यावर आलेले पालकमंत्री भरणे यांनी हत्तुरे वस्तीसह शहरातील काही कंटेन्मेंट झोनमध्ये पाहणी केली आणि तेथील नागरिकांशी लॉकडाऊन पुन्हा करण्याबाबत मते जाणून घेतली. त्यानंतर जिल्हाधिकारी कार्यालयात आढावा बैठक घेतली. या बैठकीविषयी माहिती देताना पालकमंत्री भरणे म्हणाले, कोरोना रुग्ण संख्या आणि वाढता मृत्यूदर याबाबत प्रामुख्याने चर्चा झाली.
मृत्यूदर कमी करण्यासाठी पुण्यातील बी. जे. महाविद्यालयाच्या डॉक्टरांचे पथक सोलापुरात आले आहे. कोरोनाची साखळी तोडण्यासाठी नागरिकांचे सहकार्य आवश्यक आहे.
सोलाापूर शहरात मृत्यू वाढत आहेत. कारण येथे विडी कामगार, यंत्रमाग कामगार मोठ्या संख्येने आहेत. या कामगारांमध्ये प्रतिकारशक्ती कमी असते. अशा कामगारांमध्ये काही आजारी असतील तर त्यांना तातडीने दवाखान्यात उपचारासाठी दाखल करणे गरजेचे आहे. कंटेन्मेंट झोनमधील लोकांनी कडक लॉकडाऊन लागू करण्याची मागणी करताना सांगितले की मीठ, भाकरी खाऊन घरी राहू; पण लॉकडाऊन कराच आणि साखळी तोडा. काहीजणांनी लॉकडाऊनमुळे रोजीरोटीचा प्रश्न निर्माण होत असल्याचे सांगितले. अशी दोन मते आहेत. तरीदेखील लॉकडाऊनबाबत येत्या दोन दिवसांत सर्वांशी चर्चा करून पुढील आठवड्यात निर्णय घेऊ. लॉकडाऊनचा निर्णय अद्याप झालेला नाही; पण करायचाच झाला तर संपूर्ण शहरात करायचा की काही भागांत लॉकडाऊन करायचा याबाबत सर्वांना विश्वासात घेऊन निर्णय घेऊ. जनतेला सांगून किमान पाच दिवस अगोदर सूचना देऊनच लॉकडाऊनचा निर्णय घेतला जाईल,
अचानक लॉकडाऊन जाहीर केला जाणार नाही, योग्य तो निर्णय लवकरच घेऊ.
जिल्हाधिकारी व पोलिस आयुक्त दोघांचे रिपोर्ट निगेटिव्ह आले असून ते सध्या होम क्वारंटाईन असल्याने घरूनच काम करत आहेत. दोघेही सोमवारी कामावर रूजू होत आहेत. महापालिका आयुक्त बुधवारपर्यंत कामावर हजर होतील. मोठे अधिकारी कामावर नसले तरी घरून त्यांचे सर्व शहरावर लक्ष आहे. दुसरी टीम मेहनत घेत आहे. अधिकारी नाहीत म्हणून नागरिकांनी घाबरू नये, असे आवाहन करतो. पॉझिटिव्ह रुग्ण आणि मृत्यू संख्या वाढली म्हणून नागरिकांनी घाबरू नये.
एक लाख रॅपिड टेस्टसाठीचे किट येत्या तीन दिवसांत मिळतील. लॉकडाऊन जाहीर केल्यानंतर टेस्ट झाल्या पाहिजेत. पॉझिटिव्ह आल्यानंतर कोणीही लॉकडाऊनमध्ये बाहेर पडले नाही पाहिजे. रुग्ण आढळल्यास त्यांना हॉस्पिटलची उपलब्धतता, क्वारंटाईनची सोय आदींची तयारी करूनच लॉकडाऊन होईल. पुण्याप्रमाणे टेस्टसाठी स्वतंत्र अधिकारी नियुक्त करण्यात येईल.
पुण्यातील तीन डॉक्टरांची टीम सोलापुरात आली आहे. या टीमकडून रुग्ण व मृत्यूच्या वाढत्या संख्येवर नियंत्रणासाठी काम होणार असून पुढील 15 दिवस टीम राहणार आहे. ‘महात्मा फुले आरोग्य’ योजनेचे राज्याचे प्रमुख डॉ. शिंदे आले आहेत.
शहरात अनलॉक केला; पण नियम पाळले जात नसून त्यावर कोणाचेही नियंत्रण नसल्याबाबत ते म्हणाले, पोलिस बंदोबस्त असणार असून आपण होमगार्ड यांनाही मुदतवाढ घेतली आहे. आपल्या मागणीमुळे सर्व राज्यांतील होमगार्डना मुदतवाढ मिळाली आहे.
शहर व जिल्ह्यात कोरोना रुग्ण व मृत्यू संख्या वाढत असतानाही जिल्हाधिकारी, महापालिका आयुक्त, पोलिस आयुक्त क्वारंटाईनमध्ये घरातूनच चांगले काम करीत असल्याचे सांगत पालकमंत्र्यांनी सर्व अधिकार्यांना क्लिनचीट दिल्याने आश्चर्य व्यक्त होत आहे. प्रशासकीय अधिकारी जर चांगले काम करत असतील तर रुग्ण आणि मृत्यू संख्या वाढतेय आणि कोरोनाची साखळी तुटत नसल्याची उत्तरे अनुत्तरितच राहिली आहेत.
‘डीपीसी’तून महापालिकेला 3 कोटी दिले
3 कोटी 2 लाख रुपये महापालिकेला ‘डीपीसी’मधून दिले आहेत. निधीची कोणतीही काळजी करू नये. महापालिकेला लागेल तेवढा निधी दिला जाईल, काळजी करू नये, असेही पालकमंत्री भरणे यांनी सांगितले. महापालिका आयुक्त कोरोनामुक्त होऊन बुधवार, गुुरुवारपर्यंत कामावर हजर राहतील. लॉकडाऊनमध्ये एक लाख रॅपिड टेस्ट केल्यानंतर आढळणार्या रुग्णांच्या अनुषंगाने सर्व सुविधा उपलब्ध करण्यात येतील. लॉकडाऊनबाबत लोकांच्या भावना लक्षात घेऊन आणि सर्वांना विश्वासात घेऊनच पुढील आठवड्यात कडक लॉकडाऊनचा निर्णय घेऊ, असे ना.भरणे म्हणाले.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
