टीम मंगळवेढा टाईम्स ।
पंढरपूर तालुक्यात कोरोना संसर्गाने कहर माजवला आहे. रुग्णांना दिलासा देण्यासाठी कोविड हेल्थ केअर सेंटर सुरू करण्यासाठी श्री विठ्ठल-रुक्मिणी मंदिर समिती धावून आली आहे. डॉक्टरांनी नाममात्र भाडे देण्याची तयारी दर्शविली.
मात्र, मंदिर समितीने सामाजिक भावनेतून नि:शुल्क देण्याची तयारी दर्शविली आहे. यामुळे पांडुरंग कोरोना रुग्णांच्या मदतीला धावून आल्याची भावना पंढरीवासीयांतून होत आहे.
वेदांता व व्हिडिओकॉन भक्त निवासातील खोल्या व त्यामधील २०० बेड नि:शुल्क उपलब्ध केले आहेत. कोरोना विषाणूचा प्रादुर्भाव मोठ्या प्रमाणात वाढला आहे. त्यावर राज्य शासनाकडून आवश्यक त्या उपाययोजना राबविण्यात येत आहेत.
तसेच सद्य:स्थितीत पंढरपूर शहर व परिसरात देखील मागील १५ दिवसांपासून रोज २०० ते २५० कोरोनाबाधित रुग्ण आढळून येत आहेत. पंढरपूर शहर व परिसरातील सर्व कोविड रुग्णालय भरलेली असून, ६५ एकर व श्री. गजानन महाराज भक्तनिवास येथील कोविड केअर सेंटर मध्ये देखील जागा उरलेली नाही.
या पार्श्वभूमीवर पंढरपूर शहर व परिसरातील नागरिकांच्या आरोग्याच्या दृष्टीने कोविड केअर सेंटर तयार करण्यासाठी असलेली जागेची निकड लक्षात घेता, सर्व्हे नं. ५९ येथील वेदांता व व्हिडिओकॉन भक्तनिवासाच्या खोल्या व बेड गरज पडल्यास उपलब्ध करून देण्यासाठी यापूर्वीच मंदिर समितीचे सहअध्यक्ष गहिनीनाथ ज्ञानेश्वर महाराज औसेकर व इतर सर्व सदस्यांशी याबाबत चर्चा होऊन मान्यता देण्यात आली होती.
डॉ. अपर्णा तळेकर (रा.भोसे) यांनी कोरोना विषाणूचा संसर्ग झालेल्या व्यक्तींना उपचार करण्यासाठी ‘कोरोना केअर सेंटर व प्रायमरी कोरोना हेल्थ केअर सेंटर’ सुरू करण्यासाठी श्री. विठ्ठल-रुक्मिणी मंदिर समितीचे भक्त निवास नाममात्र दराने भाडे तत्त्वावर मिळावे, अशी मागणी केली होती.
त्याअनुषंगाने मंदिर समितीने बुधवारी विशेष सभेमध्ये मंदिर समिती ही धर्मादाय संस्था असल्याने तसेच पंढरपूर शहर व परिसरातील नागरिकांच्या जीविताचा प्रश्न असल्याने वेदांता व व्हिडिओकॉन भक्त निवासातील खोल्या व त्यामधील २०० बेड नि:शुल्क उपलब्ध करून देण्याचा निर्णय घेतला आहे, अशी माहिती मंदिर समितीचे कार्यकारी अधिकारी विठ्ठल जोशी यांनी दिली.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
