मंगळवेढा टाईम्स वृत्तसेवा:-
पंढरपूर- स्वेरी आणि पंढरपूर तहसील कार्यालयाच्या वतीने राष्ट्रीय लोकशाही मतदार दिन (२५ जानेवारी) निमित्त स्वेरीच्या भव्य मैदानावर नवमतदारांमध्ये मतदान करण्यासाठी प्रेरणा मिळावी, जनजागृती व्हावी या हेतूने विशेष करून विद्यार्थीनींसाठी स्वेरीमध्ये ‘मिनी मॅरेथॉन’ स्पर्धेचे आयोजन करण्यात आले होते. यामध्ये स्वेरीसह पंढरपूर शहरातील विद्यार्थीनींनी उस्फुर्तपणे सहभाग घेतला होता.
जाहिरातीसाठी संपर्क: 7588214814
पंढरपूरच्या तहसीलदार आणि सार्वत्रिक निवडणूकीच्या (पंढरपूर विभाग) सहाय्यक मतदान नोंदणी अधिकारी डॉ. वैशाली वाघमारे व स्वेरीचे संस्थापक सचिव व अभियांत्रिकी महाविद्यालयाचे प्राचार्य डॉ. बी.पी. रोंगे यांच्या मार्गदर्शनाखाली स्वेरीचे कॅम्पस इन्चार्ज प्रा. एम. एम. पवार यांच्या सहकार्याने स्वेरीज् अभियांत्रिकीच्या राष्ट्रीय सेवा योजना कार्यक्रम अधिकारी डॉ.रंगनाथ हरीदास व प्रा.महेश मठपती यांच्या नेतृत्वाखाली स्वेरीच्या मैदानातून सुरू झालेले हे मिनी मॅरेथॉन सरकोली रोडवरील चळे फाटा पर्यंत जाऊन परत आले.
साधारण दोन किमी अंतराच्या ‘मिनी मॅरेथॉन’ स्पर्धेमध्ये उमा महाविद्यालयाच्या मोनाली जाधव यांनी प्रथम क्रमांक पटकावला तर स्वेरीच्या रोहिणी चव्हाण यांनी द्वितीय तर स्वेरीच्याच अमृता रणदिवे यांनी तृतीय क्रमांक पटकावला. उत्तेजनार्थ म्हणून आरती देवमारे प्रथम आणि राधिका पुणेकर यांना द्वितीय क्रमांकाने गौरविण्यात आले. मॅरेथॉनमधील विजेत्यांना प्रशस्तीपत्रक व स्मृतिचिन्ह देऊन पाहुण्यांच्या हस्ते गौरवण्यात आले. याच निमित्ताने तहसील कार्यालय पंढरपूरमधील अधिकारी व कर्मचारी यांच्यात देखील मिनी मॅरेथॉन स्पर्धा घेण्यात आली. यामध्ये प्रथम क्रमांक रोहिणी पाटील, द्वितीय क्रमांक अनिता जाधव तर तृतीय क्रमांक प्रार्थना पाटील यांनी पटकाविला. यावेळी तहसील कार्यालयाच्या वृषाली अधटराव, ज्येष्ठ लिपिक राहुल शिंदे, तांत्रिक सहाय्यक उमेश भोसले यांच्यासह इतर कर्मचारी उपस्थित होते.
मतदान करण्यासाठीच्या जनजागृतीबाबत मार्गदर्शन करताना तहसीलदार डॉ. वैशाली वाघमारे म्हणाल्या की, ‘सशक्त लोकशाहीसाठी मतदार साक्षरता’ अशी यंदाच्या मतदान दिनाची संकल्पना असून लोकशाही बळकट करायची असेल तर आपल्यासारख्या अठरा वर्षाच्या वयोगटातील युवक-युवतींनी या सार्वत्रिक मतदान प्रक्रियेमध्ये सहभाग घेतला पाहिजे. आपले बहुमोल मत दिले पाहिजे. मिनी मॅरेथॉनमध्ये आपल्यासारख्यांच्या सहभागामुळे मतदानाची जनजागृती वाढते म्हणून या सांघिक स्पर्धेचे आयोजन करण्यात आले आहे. या निमित्ताने ज्यांची वयाची अठरा वर्षे पूर्ण झाली आहेत त्या मुलामुलींना मतदान करण्याची प्रेरणा मिळावी म्हणून हा उपक्रम स्वेरीत प्रथम राबविण्यात आला.’ या मिनी मॅरेथॉन स्पर्धेत उमा महाविद्यालय, के.बी.पी. महाविद्यालय, स्वेरीज् कॉलेज ऑफ इंजिनिअरिंग व स्वेरीज् कॉलेज ऑफ फार्मसी या महाविद्यालयांतील विद्यार्थीनींनी सहभाग घेतला. यावेळी पंढरपूर तालुका पोलीस स्टेशनचे पोलीस कर्मचारी व पंढरपूर उपजिल्हा रुग्णालयातील कर्मचाऱ्यांचे सहकार्य लाभले. यावेळी विद्यार्थी अधिष्ठाता डॉ.अभय उत्पात, सांस्कृतिक कार्यक्रम विभागप्रमुख प्रा.करण पाटील, प्रा. के. एस. पुकाळे, प्रा. पी. डी.तरळगट्टी, इतर अधिष्ठाता, विभागप्रमुख, प्राध्यापकवर्ग, शिक्षकेतर कर्मचारी आदी उपस्थित होते.
प्रा. यशपाल खेडकर यांनी सुत्रसंचालन करून आभार मानले.
छायाचित्र- स्वेरी व पंढरपूर तहसील कार्यालयाच्या वतीने ‘राष्ट्रीय लोकशाही मतदार दिन’ निम्मित्त स्वेरीच्या मैदानांवर ‘मिनी मॅरेथॉन’ स्पर्धेचे आयोजन करण्यात आले यावेळी उदघाटन करताना तहसीलदार डॉ. वैशाली वाघमारे सोबत स्वेरीचे कॅम्पस इन्चार्ज प्रा. एम. एम. पवार, राष्ट्रीय सेवा योजना कार्यक्रम अधिकारी डॉ.रंगनाथ हरीदास व प्रा.महेश मठपतीव इतर प्रध्यक वर्ग व विद्यार्थीनी.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
