महत्वाची बातमी : तुमच्या घरी जेष्ठ व्यक्ती आहे,मग ही बातमी वाचा

मंगळवेढा टाईम्स ऑनलाईन । सोलापूर शहरातील नियमित उपचार घेणा-या ज्येष्ठ नागरिकांची माहिती प्रशासनाला द्यावी, असे आवाहन जिल्हाधिकारी मिलिंद शंभरकर यांनी आज केले.

सोलापूर शहरात विविध गंभीर आजारांवर उपचार घेणा-या (कोमॉर्बिड) ज्येष्ठ नागरिकांना कोरोना विषाणूची बाधा होऊन मृत्यू होत असल्याचे दिसते. हे प्रमाण थांबवण्यसाठी आणि कोमॉर्बिड ज्येष्ठ नागरिकांवर तत्काळ उपचार व्हावे यासाठी आज इंडियन मेडिकल असोसिएशनच्या पदाधिका-यांसमवेत बैठक झाली. बैठकीस इंडियन मेडिकल असोसिएशनचे डॉ. हरिश रायचूर, डॉ. सुदीप सारडा, सोलापूर महानगरपालिकेचे डॉक्टर जयंती आडके, डॉ. शीतलकुमार जाधव, आदी उपस्थित होते.

जिल्हाधिकारी शंभरकर यांनी सांगितले की, शहरात ज्येष्ठ नागरिक खूप आहेत. ते विविध आजारांसाठी वैद्यकीय उपचार घेत आहेत. अशा नागरिकांवर नियमित लक्ष देणे आवश्यक आहे. अशा नागरिकांची माहिती जिल्हा प्रशासनाला द्यावी. मधुमेह, रक्तदाब, ह्दय रोग, कर्करोग, एचआयव्ही, इत्यादी आजारावर उपचार घेणा-या नागरिकांची माहिती प्राधान्याने द्यावी. जेणे करुन अशा व्यक्तींशी संपर्क ठेवून त्यांना लक्षणे दिसल्यास तत्काळ उपचार करता येईल.

यावेळी व्यासपीठावर महापालिका आयुक्त दीपक तावरे, अतिरिक्त जिल्हाधिकारी संजीव जाधव, उपजिल्हाधिकारी किशोर पवार, निवासी उपजिल्हाधिकारी अजित देशमुख, सहायक पोलीस आयुक्त कमलाकर ताकवले, प्रीती टिपरे, आदी उपस्थित होते.

जिल्ह्यातील तीनशे तेवीस औद्योगिक प्रकल्प सुरु

लॉकडाऊन नंतर बंद करण्यात आलेले जिल्ह्यातील कारखाने सरु होत आहेत. सध्या जिल्ह्यातील सूक्ष्म, लघु आणि मध्यम असे 323 औद्योगिक प्रकल्प सुरु झाले असल्याची माहिती जिल्हा प्रशासनाकडून देण्यात आली आहे.

लॉकडाऊनच्या कालावधीत बंद करण्यात आलेले औद्योगिक प्रकल्प सुरु करण्यासाठी permission.midcindia.org या संकेतस्थळावर अर्ज करायचा होता. अर्ज केलेल्या 567 औद्योगिक प्रकल्पापैकी सर्वांना प्रकल्प सुरु करण्यास परवानगी देण्यात आली आहे.

त्यापैकी 323 औद्यागिक प्रकल्प सुरु झाले असून त्यामध्ये 7152 कामगार आहेत. 140 औद्योगिक प्रकल्पांनी 388 वाहनांसाठी पासची मागणी केली आहे. मात्र अद्याप या वाहनांना पास देण्यात आले नसल्याचे समन्वय अधिकारी महाव्यवस्थापक बी. टी. यशवंते यांनी सांगितले.

——————————

ब्रेकिंग बातम्या मोबाईलवर मिळवण्यासाठी आम्हाला 9561617373 या नंबरला WhatsApp करा आणि लिहा “Mangalwedha Times News”