बापरे..! दहा हजारांचे झाले दोन लाख, तरीही सावकाराचा तगादा; मजुरी करणाऱ्या तरुणानं चिठ्ठी लिहून जीवन संपवलं

मंगळवेढा टाईम्स न्युज। 

जळगाव जिल्ह्यातील चोपडा शहरातून एक खळबळजनक घटना समोर आली आहे. हातमजुरी करून आपल्या कुटुंबाचा उदरनिर्वाह करणाऱ्या योगेशने सावकाराच्या जाचाला कंटाळून आत्महत्या केल्याची धक्कादायक घटना चोपडा शहरात घडली आहे.

चोपडा शहरात राहणारा योगेश सुनील चौधरी (वय-२६) या तरुणाने अवघ्या दहा हजार रुपयांच्या कर्जापोटी तब्बल दोन लाख रुपये व्याज भरूनही सावकाराचा छळ थांबत नसल्याने टोकाचे पाऊल उचलले असल्याची माहिती समोर आली आहे. पंचवीस तारखेला सायंकाळी सहा वाजेच्या सुमारास योगेशने घरी गळफास घेऊन त्याचे जीवन संपवले आहे.

दोन लाख रुपये केले वसूल

मयत योगेश हातमजुरी करून आपल्या कुटुंबाचा उदरनिर्वाह करत होता. अत्यंत गरिबीतील परिस्थितीत असलेल्या योगेशने पिंटू नामक व्यक्तीकडून दहा हजार रुपये उसने घेतले होते.

या तुटपुंज्या रकमेच्या बदल्यात सावकाराने आतापर्यंत योगेशकडून दोन लाख रुपये व्याजापोटी वसूल केले होते. तरीही सावकाराची पैशाची भूक शमली नव्हती. तो वारंवार योगेशकडे अधिक पैशांचा तगादा लावत होता.

सुसाइड नोटमध्ये काय?

योगेशने मृत्यूपूर्वी संपूर्ण हकीकत सुसाइड नोटमध्ये लिहिली आहे. सापडलेल्या चिठ्ठीत त्याने सावकार पिंटू यांच्या जाचाला कंटाळून आत्महत्या करत असल्याचे नमूद केले आहे.

तसेच केवळ पैशांचा तगादाच नव्हे, तर पिंटूने योगेशला मारहाण केली होती आणि त्याच्या वृद्ध आई-वडिलांनाही अर्वाच्य भाषेत शिवीगाळ केली होती.

या सततच्या मानसिक आणि शारीरिक छळाला कंटाळून आत्महत्या करत असल्याचे योगेशने चिठ्ठीत नमूद केले आहे. “पिंटूला कडक शिक्षा व्हावी,” असेही चिठ्ठीत लिहिले आहे.

कठोर कारवाईची मागणी

योगेशच्या निधनाने त्याच्या कुटुंबावर दुःखाचा डोंगर कोसळला आहे. त्याच्या पश्चात आई-वडील आणि एक भाऊ असा परिवार आहे. हे संपूर्ण कुटुंब मोलमजुरी करून उदरनिर्वाह करत होते.

अत्यंत कष्टाळू मुलाचा अशा प्रकारे अंत झाल्याने परिसरात संताप व्यक्त केला जात आहे. स्थानिक पोलिसांनी या प्रकरणी तपास सुरू केला असून दोषी सावकारावर कठोर कारवाईची मागणी नातेवाईक आणि मित्रमंडळींकडून होत आहे.

अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262

“मंगळवेढा टाईम्स“च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.

मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.

बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.

बातम्या सर्वप्रथम जाणून घेण्याकरिता लाईक करा आमचे फेसबुक पेज