टीम मंगळवेढा टाईम्स ।
विधानपरिषदेच्या पुणे पदवीधर व शिक्षक मतदारसंघाच्या निवडणूक प्रचाराची रणधुमाळी शिगेस पोहोचली आहे. प्रामुख्याने भाजपचे संग्राम देशमुख, अपक्ष उमेदवार नीता ढमाले, शरद पाटील व राष्ट्रवादीचे अरुण लाड यांच्यात काटे की टक्कर होत आहे.आरोप-प्रत्यारोपांचा धुरळा उडाला आहे. यानिमित्ताने अनेकांच्या प्रतिष्ठा पणाला लागल्या आहेत.
मंगळवारी (दि. 1 डिसेंबर) मतदान होत आहे. गुरुवारी (दि. 3) निकाल जाहीर होणार आहे. निवडणुकीसाठी प्रशासनाने यंत्रणा सज्ज ठेवली आहे.पूर्वी ही निवडणूक कधी होत होती हे सामान्यांना कळतही नव्हते. पण यावेळी सार्वत्रिक निवडणुकीसारखी चुरस निर्माण झाली आहे.
पदवीधरसाठी 62 तर शिक्षक मतदारसंघासाठी 35 उमेदवार मैदानात आहेत. ‘पदवीधर’मध्ये भाजपचे संग्राम देशमुख,अपक्ष उमेदवार नीता ढमाले,प्रा.शरद पाटील व राष्ट्रवादीचे उमेदवार अरुण लाड यांच्यामध्ये प्रमुख लढत होत आहे.
संग्राम देशमुख यांना पक्षाचा मोठा पाठिंबा मिळाला आहे तर नीता ढमाले यांना पदवीधर मतदारांचा व लाड यांना राष्ट्रवादीचे नेते शरद पवार व मंत्री जयंत पाटील तसेच महाआघाडीतील काँग्रेस पाटील यांनी ताकद दिली आहे.
ही लढत चौरंगी होत असून, भाजपचे प्रदेशाध्यक्ष चंद्रकांत पाटील आणि राष्ट्रवादीचे प्रदेशाध्यक्ष जयंत पाटील यांच्यासाठी प्रतिष्ठेची बनली आहे.
प्रचारासाठी नीता ढमाले या आघाडीवर आहेत. जाहीर सभा, कार्यकर्ता मेळाव्यांपासून ते मतदारांच्या गाठीभेटी घेण्यासाठी या नेत्यांची धावपळ सुरू आहे. नेत्यांच्या बैठका घेऊन प्रचाराच्या सूचना दिल्या जात आहेत. जादा मतदान असलेली गावे आणि शहरांवर विशेष नजर ठेवून कार्यकर्त्यांद्वारे मतदारांच्या घरापर्यंत पोहोचण्याचे प्रयत्न सुरू आहेत.
प्रमुख व स्थानिक नेत्यांनीही प्रचाराच्या रणधुमाळीत सक्रिय सहभाग घेतल्याने राजकीय वातावरण चांगलेच तापले आहे.
याचबरोबर जनता दलातर्फे माजी आमदार शरद पाटील, इतिहास संशोधक श्रीमंत कोकाटे, ‘आप’चे डॉ. अमोल पवार यांनीही जोरात प्रचार चालविला आहे.
अपक्ष उमेदवार नीता ढमाले यांनी प्रचाराचा धडाका उठवला आहे. सोशल मीडियावर तर प्रचाराचा धुरळा उडाला आहे. त्यामुळे आता कोण बाजी मारणार, याकडे सार्यांचेच लक्ष लागले आहे.
कोरोनामुळे मतदान केंद्रे केली कमी
यापूर्वी या मतदार संघात 1200 मतदारांसाठी एक मतदान केंद्र असायचे. मात्र, कोरोनाच्या पार्श्वभूमीवर 500 ते 700 मतदारांसाठी एक केंद्र तयार करण्यात आले आहे. त्यानुसार पदवीधर मतदारसंघात 589 मतदारांसाठी एक आणि शिक्षक मतदारसंघासाठी 258 मतदारांमागे एक मतदान केंद्र आहे.
विभागातील पाच जिल्ह्यांमध्ये 1202 मतदान केंद्र आहेत. पदवीधर मतदारसंघामध्ये 835 आणि शिक्षक मतदारसंघात 367 मतदान केंद्र आहेत. मात्र केंद्रांची विभागणी करताना मतदारांना दूरवरची आणि दोन वेगवेगळी केंद्र आली आहेत. मतदान करताना सोशल डिटन्स व मास्कचा वापर अनिवार्य करण्यात आला आहे.
पुणे पदवीधर मतदारसंघातील प्रमुख उमेदवार
संग्राम देशमुख (भाजप महायुती), नीता ढमाले(अपक्ष), अरुण लाड ( महाविकास आघाडी), प्रा.शरद पाटील (जनता दल), श्रीमंत कोकाटे ( इतिहास संशोधक),
शिक्षकसाठी 35 उमेदवार रिंगणात
पुणे शिक्षक मतदारसंघात 35 जण रिंगणात आहेत. मावळते आमदार दत्तात्रय सावंत पुन्हा एकदा अपक्ष म्हणून निवडणूक लढवत आहेत. काँग्रेसने जयंत आसगावकर, भाजपने जितेंद्र पवार आणि वंचित बहुजन आघाडीने सम्राट शिंदे यांना उमेदवारी दिली आहे.
पदवीधर मतदारसंघातील मतदारसंख्या
1) पुणे : एक लाख 36 हजार 611, 2) कोल्हापूर: 89 हजार 529, 3) सांगली : 87 हजार 233, 4) सातारा : 59 हजार 71, 5) सोलापूर : 53 हजार 813, एकूण – चार लाख 26 हजार 257
शिक्षक मतदारसंघाचे जिल्हानिहाय मतदार
1) पुणे : 32 हजार 201, 2) सोलापूर: 13 हजार 584, 3) कोल्हापूर : 12 हजार 237 4) सातारा : सात हजार 711, 5) सांगली: सहा हजार 812, एकूण : 72 हजार 545
प्रश्नांपेक्षा राजकीय जुगलबंदीच अधिक
या निवडणुकीत विद्यार्थी, बेरोजगारी, शिक्षण, शिक्षक व त्यांचे प्रश्न यांची चर्चा होणे अपेक्षित होते. पण प्रचारात त्याचा कोठेही लवलेश दिसला नाही. उमेदवारांच्या जाहीरनाम्यातून त्यांचे सामान्य ज्ञान प्रकट होत आहे.
धोरणांवर प्रचार करण्यापेक्षा उमेदवारांची प्रतिमाहनन करण्यावर भर दिला जात आहे. एकमेकांची उणीदुणी काढण्याबरोबर राजकीय बदला घेण्याची भाषा वापरली गेली. प्रश्नांपेक्षा राजकीय जुगलबंदीच अधिक रंगली.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
![ताज्या बातम्या थेट मोबाईलवर मिळवण्यासाठी आजच जॉईन व्हा ताज्या बातम्या थेट मोबाईलवर मिळवण्यासाठी आजच जॉईन व्हा](https://mangalwedhatimes.in/wp-content/uploads/2021/12/WhatsApp-Add.gif)
बातम्या सर्वप्रथम जाणून घेण्याकरिता लाईक करा आमचे फेसबुक पेज