टीम मंगळवेढा टाईम्स ।
मंगळवेढा तालुक्यातील तामदर्डी येथील ७० हजार रुपये किमतीच्या म्हैस चोरी प्रकरणी पोलिसांनी इब्राहिम कुरेशी ( वय २४ रा.मोहोळ ) या व्यापाऱ्यास सहआरोपी करून मंगळवेढा पोलिसांनी अटक केली आहे.
दरम्यान, या आरोपीस शनिवारी न्यायालयात उभे करण्यात येणार असल्याचे पोलिस सुत्रांनी सांगितले.तामदर्डी शिवारातून फिर्यादी सद्दाम तांबोळी (रा.बेगमपूर) यांच्या शेतातील गोठयातून बांधलेल्या ७० हजार रुपये किमतीची म्हैस व रेडी दि . २३ जुलै रोजी यातील आरोपी कमाल वाघमारे व सचिन कोळी ( रा.सिध्दापूर ) यांनी चोरून नेली होती.
या म्हशी मोहोळचे व्यापारी तथा आरोपी इब्राहिम कुरेशी याने विकत घेतल्या होत्या.म्हैस चोरून नेणाऱ्या वरील दोघा आरोपींना तपासिक अंमलदार दयानंद हेबाडे यांनी अटक करून न्यायालयात उभे केले असता तीन दिवसाची पोलिस कोठडी दिली होती.
या दरम्यान चौकशीत आरोपीनी त्या म्हशी मोहोळ येथील व्यापारी इब्राहिम कुरेशी याला विकल्याची कबुली दिली होती.पोलिस हवालदार हेबाडे व पोलिस नाईक शिवाजी पांढरे, पोलिस शिपाई सोमनाथ माने, सुनिल मिसाळ यांच्या पथकाने तात्काळ मोहोळ गाठून व्यापारी कुरेशी याला सहआरोपी करून शुक्रवारी अटक केली आहे.
शनिवारी न्यायालयात उभे करण्यात येणार असल्याचे सांगितले. दरम्यान, या म्हशी चोरी प्रकरणातील आरोपी कमाल वाघमारे व सचिन कोळी या दोघांची दि.२ सप्टेंबर रोजी पोलिस कोठडी संपल्यानंतर त्या दोघांना सिध्दापूर येथील दोन म्हशी चोरी प्रकरणातील गुन्हयात वर्ग करण्यात आले असल्याचे हेंबाडे यांनी सांगितले.
दरम्यान , दुसरी म्हैस चोरीची घटनाही यामुळे उघड होणार आहे.
ट्रॅक्टर पलटी झाल्याने चालक ठार
ट्रॅक्टर चालवत असताना अचानक पलटी झाल्यानंतर ट्रॅक्टर अंगावर पडल्याने चालक दादासो आक्रीशेन बोडरे वय २५ रा.शिरभावी ता.सांगोला याचा जागीच मृत्यू झाला.
हा अपघात ३ सप्टेंबर रोजी सकाळी १२ च्या सुमारास शिरभावी येथील होवाळ वस्तीवर घडला.
सदर घटनेची माहिती मिळताच मयताचा चुलता गणेश प्रभाकर बोडरे यांनी घटनास्थळी धाव घेतली. त्यांनी आसपासच्या लोकांच्या मदतीने दादासो बोडरे यांना उपचारासाठी सांगोला ग्रामीण रुग्णालयात दाखल केले.
डॉक्टरांनी तपासणी केली असता तो उपचारापूर्वीच मयत झाल्याचे सांगितले. याप्रकरणी गणेश बोडरे यांनी सांगोला पोलीस ठाण्यात खबर दिली आहे.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज