सावध व्हा! ‘फ्री गिफ्ट व्हाउचर’च्या आमिषाने ४० हून अधिक जोडपे फसले; परदेशवारीच्या नावाखाली दाम्पत्यांना लाखोंचा चुना

मंगळवेढा टाईम्स न्युज नेटवर्किंग ।

परदेशात वाढदिवस साजरा करण्याचे स्वप्न, आलिशान रिसॉर्टमध्ये सुट्या घालवण्याचे आश्वासन आणि दरमहा केवळ १८०० रुपयांचा हप्ता. या आकर्षक ऑफर्सच्या आमिषाला भूललेल्या साताऱ्यातील ४० हून अधिक दाम्पत्यांना लाखो रुपयांना गंडा घालण्यात आला आहे.

संबंधित कंपनीने सेमिनारच्या माध्यमातून ग्राहकांना मेंबरशिप घेण्यास प्रवृत्त करून फसवणूक केल्याची तक्रार असून, न्यायासाठी तक्रारदारांनी आता थेट पोलिस महासंचालकांकडे धाव घेतली आहे.

साताऱ्यातील एका अलिशान हाॅटेलमध्ये २०२३ ला एका कंपनीने सेमिनार आयोजित केला होता. या सेमिनारमध्ये साताऱ्यातील पन्नासहून अधिक दाम्पत्य हजर होते.

या दाम्पत्याला तुम्ही कोठेही फिरत नाही. तुम्हाला आमच्या कंपनीकडून गिफ्ट व्हाउचर लागले आहे. हे व्हाउचर भरल्यानंतर तुम्हाला पाच वर्षे फक्त १८०० रुपये महिन्याला भरायचे आहेत.

एक महिन्यानंतर पैसे परत देऊ” असे आश्वासन देण्यात आले.

या आश्वासनाला भुलून सेमिनारला आलेल्या दाम्पत्यांनी मेंबरशिप बूक केली. दोन-तीन वर्ष काहींनी पैसे भरले. मात्र, ऐनवेळी कंपनीचा संपर्क बंद झाला.

साताऱ्यातील काही एजंटांशी तक्रारदार दाम्पत्यांनी संपर्क साधला असता संबंधित कंपनी ठाण्यातील असल्याचे समोर आले. यानंतर अनेक जण ठाण्याला गेले.

मात्र, संबंधित कंपनीचे शटर महिनोन्महिने बंद असल्याचे त्यांना समजले. आपण पुरते फसलो गेलो, याची जाणीव झाल्यानंतर तक्रारदारांनी साताऱ्यापासून ठाणे पोलिस आयुक्तालयात तक्रार अर्ज दिले; परंतु अद्यापही त्यांची कोणी दखल घेतली नाही.

नेमकं कसं फसवलं गेलं

अनेक दाम्पत्यांना हेरून त्यांना महिलांकरवी फोन करण्यात आले. तुम्हाला गिफ्ट व्हाउरच लागले आहे, असे सांगून सेमीनारमध्ये पती-पत्नीला येणे बंधनकारक करण्यात आले. तेथे गेल्यानंतर एकट्या महिलेचा ब्रेन वाॅश केला जायचा. तुमच्या लग्नाचा वाढदिवस परदेशात साजरा करा. तुम्ही कुठेही फिरत नाही.

पतीला परदेशात घेऊन जाण्याची हीच संधी आहे. अशी वेगवेगळी आमिषे दाखवून पत्नीला वश केले जायचे. त्यानंतर पत्नीच्या सांगण्यावरून पती लगेच मेंबरशिप घेण्यास तयार व्हायचे. अशा प्रकारे सेमिनारला आलेल्या ४० हून अधिक जोडप्यांनी त्या ठिकाणी मेंबरशिप केल्याचे तक्रारदार विकास कदम सांगत आहेत.

कुटुंब उद्ध्वस्त

या फसवणुकीमुळे कुटुंबीयांना मानसिक धक्का बसला आहे. काहींना क्रेडिट कार्डचे हप्ते फेडण्यासाठी पत्नीचे मंगळसूत्र आणि इतर दागिने बँकेत तारण ठेवावे लागले. काही कुटुंबांना शेतीशिवाय दुसरे उत्पन्न नसल्याने मुलांचे शिक्षणही अडचणीत आले आहे.

म्हणे तुमच्यासारखे अनेक जण चाैकशीला येतात

या कंपनीच्या कार्यालयात चौकशीला गेलेल्या अनेक जिल्ह्यातील लोकांना ‘तुमच्यासारखे अनेक जण चौकशीला येतात’ असे कर्मचाऱ्यांकडून सांगण्यात येत असल्याचे तक्रारदार सांगत आहेत. त्यामुळे फसवणुकीची व्याप्ती कोट्यवधींच्या घरात असल्याचे बोलले जात आहे.

सांगितले एक; पण करारनामा भलताच..

संबंधित कंपनीने इंग्लिश भाषेत असलेला करार लोकांकडून करून घेतला. मात्र, करार न वाचता अनेकांनी स्वाक्षरी केली. त्यामध्ये कंपनीची केवळ मेंबरशिप घेतली, असा उल्लेख आहे. त्यामध्ये कुठेही तुम्हाला फिरण्यासाठी मोफत परदेशवारी असा उल्लेख नसल्याचे समोर आले.

माझ्याकडून १ लाख १२ हजार रुपये क्रेडिट कार्डवरून घेतले आहेत. एक महिन्यानंतर कंपनीच्या कार्यालयात फोन लावला असता तो बंद लागला. संचालकांनी फोन उचलणे बंद केले आणि नंबर ब्लॉक केले. त्यामुळे प्रत्यक्ष ऑफिसवर गेलो असता ठाण्यातील तिन्ही कार्यालये बंद असल्याचे दिसले. – विकास कदम, तक्रारदार, खेड, सातारा.

अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262

“मंगळवेढा टाईम्स”च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.

मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.