भयंकर! हिटर फुटलं अन् उकळतं पाणी घरात; आई-वडिलांसह मुलगीही भाजली; बटन बंद करण्याचे विसरले

टीम मंगळवेढा टाईम्स।

थंडीचे दिवस असल्याने पाणी तापवण्यासाठी हिटरचे बटन चालू केले, मात्र ते बंद करण्याचे विसरल्याने हिटर गरम होऊन फायबरची टाकी फुटली. अन् उकळतं पाणी सबंध घरभर पसरल्याने यामध्ये नऊ वर्षाची बालिका आणि पती-पत्नी असे तिघे जण गंभीररीत्या भाजले.

सोमवारी पहाटेच्या सुमारास मोहोळ तालुक्यातील सोहाळे येथे ही धक्कादायक घटना घडली. अजिंक्या समाधान जगताप (वय ९), समाधान सदाशिव जगताप (वय- ३५), दीपाली समाधान जगताप (वय- ३०, तिघे रा. सोहाळे, ता. मोहोळ, जि. सोलापूर)

असे भाजलेल्या तिघांची नावे आहेत. या सर्वांना सोलापूरच्या शासकीय रुग्णालयात उपचारासाठी नातलग ज्योतिबा जगताप यांनी दाखल केले आहे.

यातील समाधान जगताप हे त्यांची मुलगी व पत्नीसमवेत सोहाळे येथील गावात राहतात. गरम पाणी तापवण्यासाठी त्यांनी ५०० लिटर क्षमतेच्या फायबरच्या टाकीला हिटर बसवून घेतले होते. थंडीचे दिवस असल्याने आणि लाईट अधून-मधून जाते म्हणून रात्री पाणी तापवण्यासाठी हिटरचे बटन चालू केले होते.

काही तासानंतर बटन बंद करण्याऐवजी विसरून गेल्याने टाकीतील पाणी उकळले गेले. हिटरही तापून, टाकी फायबरची असल्याने ती फुटून जवळपास ५०० लिटर पाणी तिघे जण झोपलेल्या अंथरुणावर पसरले.

गरम पाण्याच्या चटक्याने तिघांनी जीवाच्या आकांताने आरडाओरडा केला. या आवाजाने आजूबाजूचे लोक जागे झाले. त्यांना गरम पाण्यापासून दूर केले.

तातडीने त्यांना सोलापूरच्या शासकीय रुग्णालयात आणून दाखल करण्यात आणल्याचे भाजलेल्या समाधान जगताप यांचे सोलापुरातील बंधू ज्योतिबा जगताप यांनी सांगितले.

७० टक्के भाजली..

तिघांवरही शासकीय रुग्णालयातील बर्न केअर सेंटरमध्ये उपचार सुरू आहेत. यातील नऊ वर्षाची अजिक्या ही ७० टक्के भाजल्याने तिची प्रकृती चिंताजनक असून, सर्वांवर उपचार सुरू असल्याचे डॉक्टरांनी सांगितल्याचे ज्योतिबा जगताप यांनी स्पष्ट केले.

अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262

“मंगळवेढा टाईम्स“च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.

मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.