(मंगळवेढा : समाधान फुगारे)
मंगळवेढा तालुक्यात इंडिया पोस्ट पेमेंट बँक खाते काढणे या मोहिमेचा शुभारंभ ग्रामपंचायत मारापुर येथे तालुका आरोग्य अधिकारी डॉ.नंदकुमार शिंदे, उपविभागीय डाक निरीक्षक सोमनाथ गायकवाड यांच्या हस्ते करण्यात आला.यावेळी मा.सरपंच विनायक यादव ,माजी सदस्य विक्रम यादव,पोलीस पाटील संजय पाटील,बाबुराव माने,शिक्षक,ग्रामस्थ,आरोग्य कर्मचारी, आशा,गतप्रवर्तक आदि उपस्थित होते.
आरोग्य विभाग पंचायत समिती मंगळवेढा व डाक विभाग मंगळवेढा यांच्या संयुक्त विद्यमाने ही मोहीम दिनांक पाच-सहा व दहा तारखेला राबवली जात असून दररोज सुमारे पंचेचाळीस ते पन्नास गावे, उपकेंद्रात तसेच उर्वरित लाभार्थ्यांना दिनांक दहा रोजी प्राथमिक आरोग्य केंद्राच्या ठिकाणी या मोहिमेचा लाभ घेता येणार आहे.
यावेळी तालुका आरोग्य अधिकारी डॉक्टर नंदकुमार शिंदे यांनी आरोग्य विभागामार्फत शासनाच्या जननी सुरक्षा योजना, प्रधानमंत्री सुरक्षित मातृत्व योजना, कुटुंब कल्याण योजना, आयुष्यमान भारत योजना,क्षयरुग्णांसाठी पोषण आहार भत्ता आदी योजनांचे लाभ लाभार्थ्याला थेट खात्यावर जमा होणार असून बँक खाते नसल्यामुळे कोणताही लाभार्थी मिळणाऱ्या लाभापासून वंचित राहणार नसल्याचे सांगितले. या मोहिमेचा लाभ जास्तीत जास्त लाभार्थ्यांना मिळवून देण्यासाठी प्रत्येक गावातील राजकीय मान्यवर, सामाजिक कार्यकर्ते ,आरोग्य कर्मचारी, आशा स्वयंसेवक यांनी सहकार्य करण्याचे आवाहन डॉक्टर नंदकुमार शिंदे यांनी केले.
उपविभागीय डाक निरीक्षक सोमनाथ गायकवाड यांनी इंडिया पोस्ट पेमेंट बँक खाते हे आधार लिंकड, पेपरलेस,डिजिटल पासबुक,एसएमएस, एनईएफटी -आरटीजीएस या मोफत सुविधा, इतर बँकेतील पैसे पोस्ट ऑफिस मधून काढता येणे,IPPB ॲप द्वारे ऑनलाईन सुविधा आदि फायदे नमूद करून हे खाते डिजिटल युगाची सुरुवात असल्याचे सांगितले.
या मोहिमेनंतर लाभार्थ्यांच्या सोयीकरिता पोस्ट विभागाच्या सहकार्याने नवीन आधार कार्ड, आधार कार्ड दुरुस्ती मोहीम राबवण्यात येणार असल्याची माहिती डॉक्टर नंदकुमार शिंदे यांनी दिली.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
