बापलेकाच्या खून प्रकरणात आरोपीस जन्मठेप

मंगळवेढा टाईम्स वृत्तसेवा:-

चोरोची (ता. कवठेमहांकाळ) येथे शेत जमिनीच्या वादातून संदीपान बाबासो शिंगाडे व राजकुमार संदीपान शिंगाडे या बापलेकाचा चाकूने भोसकून खून केल्याप्रकरणी आरोपी राहुल रामा सरगर (वय 25) याला जन्मठेपेची शिक्षा सुनावली. प्रमुख जिल्हा व सत्र न्यायाधीश विजय पाटील यांनी हा निकाल दिला. जिल्हा सरकारी वकील उल्हास चिप्रे यांनी हा खटला चालवला.

अधिक माहिती अशी, चोरोची गावातील शिंगाडे मळा येथे मृत संदीपान हे भाऊ रामचंद्र, शामराव, विलास, रावसाहेब आणि चुलते देवाप्पा शिंगाडे असे सर्वजण कुटुंबासमवेत राहत होते. आरोपी राहुल सरगर हा देवाप्पा शिंगाडे यांच्या जावयाचा मुलगा असून तो देखील भाऊ महादेव सरगरसमवेत कुटुंबासह शिंगाडे मळ्यात राहण्यास होता.

शिंगाडे यांच्या वस्तीवर जाण्यासाठी शेतातून वाट होती. सर्वजण या वाटेवरूनच जात होते. ऑगस्ट 2015 मध्ये गावच्या सरपंचानी शेतातील रस्ता सरकारी खर्चातून करून मिळतो असे सांगितले. त्यावेळी रामा सरगर याने नकाशात वाट नाही आणि आतासुद्धा येथे वाट नाही असे सांगून तो निघाला.

रात्री रामाचा मुलगा राहुल सरगर याने सदरच्या रस्त्यावर दगड ठेवले. दुसऱ्या दिवशी सायंकाळी पाचच्या सुमारास संदीपान शिंगाडे व मुलगा राजकुमार यांनी चुलते देवाप्पा आणि आरोपी राहुल याला रस्ता का बंद केला म्हणून विचारणा केली. तेव्हा त्यांच्यात वादावादी झाली. एकमेकांना शिवीगाळ झाली. त्याचवेळी राहुल याने त्याच्याकडील चाकू काढून राजकुमारच्या पोटात वार केले. तसेच संदीपान यांच्या पोटात आणि तोंडावरही वार केले. संदीपान यांचा भाऊ रामचंद्र हा सोडवण्यासाठी धावला असता त्यांच्यावरही वार केले. तेव्हा शिंगाडे कुटुंबातील महिला भांडणे सोडवण्यासाठी धावल्या.
जखमी बापलेक संदीपान व राजकुमार यांना श्री. यमगर यांच्या जीपमधून मिरजेच्या सिव्हील हॉस्पिटलमध्ये उपचारासाठी दाखल केले. तेव्हा डॉक्‍टरांनी दोघांना मृत घोषित केले.

जखमी रामचंद्र यांनी कवठेमहांकाळ पोलिस ठाण्यात फिर्याद दिली. त्यानुसार गुन्हा दाखल केला. सहाय्यक निरीक्षक इनामदार यांनी तपास करून आरोपपत्र दाखल केले होते. सरकारतर्फे खटल्यात आठ साक्षीदार तपासण्यात आले. साक्षी पुराव्यानुसार राहुलला दोषी ठरवून जन्मठेप व पाच हजार रूपये दंडाची शिक्षा सुनावली.