मंगळवेढा टाईम्स न्युज नेटवर्क।
पास घरी राहिला म्हणून चिमुकल्याला हायवेवर उतरवल्याचा धक्कादायक प्रकार सोलापूर मंगळवेढा एसटी बसमध्ये घडल्याचे समोर आले आहे.
हाचिमुरडा कंडक्टरला वारंवार आपल्या ‘पप्पांना फोन करा…’ ते पैसे देतील, अशी विनवणी करीत असतानाही या कंडक्टरने या लहानग्याला दप्तरासह हायवेवर वाहनांच्या गर्दीत उतरविल्याची संतापजनक घटना घडली आहे.
दरम्यान, या प्रकरणानंतर आमदार समाधान आवताडे यांनी तातडीने विभागीय वाहतूक अधिकारी, महाराष्ट्र राज्य मार्ग परिवहन महामंडळ यांना पत्रव्यवहार करून संबंधित एस.टी. च्या वाहकाची तात्काळ चौकशी करून कठोर कारवाई करणेत यावी.
आणि या पुढे असे प्रकार घडून नयेत याची दक्षता घेणेबाबत सर्व वाहक चालकांना ताबडतोब सूचना देण्यात यावी अशी मागणी केली आहे.
सदर प्रकारामुळे पालक, ग्रामस्थ आणि सर्वसामान्य नागरिकांतून तीव्र संताप व्यक्त केला जात आहे. ब्रह्मपुरी (ता. मंगळवेढा) येथील प्रथमेश राहुल पाटील हा सातवीतील विद्यार्थी रोज शिक्षणासाठी मंगळवेढ्याला ये-जा करतो.
शनिवारी नेहमीप्रमाणे सायंकाळी पाच वाजता तो मंगळवेढा आगाराची सोलापूर-मंगळवेढा (बस क्रमांक ९४०५) या एसटीने प्रवास करत होता. ब्रह्मपुरीपासून काही अंतरावर बस आल्यानंतर वाहक तिकीट काढण्यासाठी आला. यावेळी प्रथमेशने बॅगमध्ये पास शोधला असता, तो चुकून घरी राहिल्याचे लक्षात आले.
घाबरलेल्या प्रथमेशने वडिलांना फोन करण्याची विनंती केली.’पप्पा पैसे देतील,’ असे तो वारंवार सांगत होता. मात्र त्या निरागस शब्दांनाही वाहकाने किंमत दिली नाही. क्षणाचाही विचार न करता, सायंकाळच्या वेळी, भरधाव वाहनांच्या गर्दीत बसचा दरवाजा उघडून त्या चिमुकल्याला थेट महामार्गावर उतरवण्यात आले.
डोळ्यांत पाणी, मनात भीती आणि आजूबाजूला धावणारी वाहने
अचानक रस्त्यावर सोडल्यामुळे प्रथमेश गोंधळून गेला. डोळ्यांत पाणी, मनात भीती आणि आजूबाजूला धावणारी वाहने…अखेर त्याने रस्त्यावरून जाणाऱ्या एका दुचाकीस्वाराला हात दाखवला. त्या व्यक्तीच्या मदतीने तो कसेबसे घरी पोहोचला. घरी आल्यानंतर त्याच्या थरथरत्या आवाजात घडलेला प्रकार ऐकून कुटुंबीय हादरून गेले. या घटनेनंतर पालकांनी संतप्त भावना व्यक्त केल्या.
‘पास विसरणे ही चूक असू शकते; पण त्यासाठी लहानग्या विद्यार्थ्याला महामार्गावर उतरवणे म्हणजे त्याच्या जीवाशी खेळ आहे,’ असा सवाल उपस्थित होत आहे. या प्रकरणी पालक राहुल पाटील यांनी परिवहन मंत्री, परिवहन आयुक्त,जिल्हा आगार प्रमुख व तालुका आगार व्यवस्थापकांकडे लेखी तक्रार दाखल करून संबंधित वाहकावर निलंबनाची कारवाईची मागणी केली आहे. सरकार मोफत पास देते, पण एसटीत माणुसकी कुठे हरवली?, असा सवाल उपस्थित होत आहे.
धडा शिकवणारी कठोर कारवाई करा
एकीकडे राज्य सरकार शालेय विद्यार्थ्यांना मोफत पास, महिलांना व ज्येष्ठ नागरिकांना सवलती देत एसटी महामंडळाला वाचवण्याचा प्रयत्न करत आहे. पण दुसरीकडे, एका पाससाठी चिमुकल्याला चक्क महामार्गावर उतरणारे निष्टुर हात या सगळ्या निर्णयांची थट्टा करत आहेत.संवेदनाहीन, मुजोर वर्तनामुळे आज एका मुलाचा जीव धोक्यात आला. उद्या हेच प्रकार कुणाच्या नशिबी येणार, हा प्रश्न प्रत्येक पालकाच्या मनात आहे.अशा घटनांमुळे केवळ एखाद्या कुटुंबाचे नव्हे, तर संपूर्ण एसटी महामंडळाच्या विश्वासार्हतेचे नुकसान होत आहे. आता केवळ चौकशी नव्हे, तर धडा शिकवणारी कठोर कारवाईच आवश्यक असल्याची तीव्र मागणी नागरिकांतून होत आहे.
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स”च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
