तरुणांनो सावधान! सोलापुरात लग्नासाठी मुलगी दाखवून दीड लाखाची केली फसवणूक

टीम मंगळवेढा टाईम्स ।

लग्नाकरिता मुलगी दाखवून त्या बदल्यात दीड लाखापेक्षा अधिक रक्कम उकळून पोबारा करून फसवणूक केल्याप्रकरणी

मुबारक महंमद मुल्ला, धानम्मा बिराजदार, शामल चव्हाण, सुरेखा चव्हाण, सुरेखा पुजारी व महानंदा ( पूर्ण नाव माहित नाही ) यांच्या विरोधात सोलापुरातील एमआयडीसी पोलीस ठाण्यात गुन्हा दाखल झाला आहे.

यातील तक्रारदार बाळासाहेब रमेश मोरे (वय २७ , रा . जळकेवाडी , ता . कर्जत , जि . अहमदनगर ) हे आपल्या आई , वडील व मोठ्या भावासह राहत असून मोठा भाऊ बापूसाहेब यांच्यासाठी फिर्यादी व त्यांचे नातेवाईक लग्न स्थळ बघत होते.

दि.३ नोव्हेंबर २०२२ रोजी फिर्यादी यांनी निलेश विठ्ठल यादव यांना दत्तात्रय दळवी यांच्याकडे स्थळ बघण्याकरता सांगितले. दळवी यांनी शामल चव्हाण ( रा.गोरे वस्ती , वाघोली , पुणे ) यांच्याकडे जावा, असे सांगितले.

चव्हाण यांना निलेश यादव यांनी संपर्क साधला असता सोलापूर येथे मुलगी आहे. पण ती मुलगी बघण्यासाठी सोलापूरला यावे लागेल व लग्नासाठी दीड लाख रुपये खर्च येईल, असे त्यांनी सांगितले.

ठरल्याप्रमाणे फिर्यादी व त्यांचे कुटुंब मुलगी बघण्याकरिता सोलापुरातील टेंभुर्णी येथे आले. तिथून ते सर्वजण चारचाकी वाहनामधून सोलापूर येथे आले.

सोलापुरात मुबारक मोहम्मद मुल्ला ( वय ४० , रा . जत ) यांची ओळख करून दिली त्यांच्यासोबत धानम्मा नागनाथ बिराजदार ही महिला होती. या दोघांनी फिर्यादीच्या नातेवाईकांना जुने घरकुल येथील पत्र्याच्या घरात घेऊन गेले.

तेथे दोघांनी सुरेखा पुजारी नावाच्या मुलीचे स्थळ दाखवले मुलीचे आई-वडील मयत झाले आहेत, असे सांगितले. मुबारक मुल्ला व धानम्मा बिरादार या दोघांनी लग्नाचे पेपर तयार करून घेण्यासाठी म्हणून सुरुवातीला १० हजार रुपये फोन पे मागून घेतले.

दुसऱ्या दिवशी बॉन्ड लिहून घेत असताना धानम्मा बिराजदार यांच्या बँक अकाउंटवर १ लाख १० हजार रुपये पाठवण्याकरिता सांगितले.

फिर्यादीने मोबाईल अॅपद्वारे बिराजदार यांच्या अकाउंटवर ६० हजार रुपये तसेच निलेश यादव यांनी रोख ५० हजार रुपये असे १ लाख १० हजार रुपये बिराजदार यांना दिले.

शामल चव्हाण यांच्या अकाऊंटवर १५ हजार रुपये पाठवले. मुबारक मुल्ला यांच्या मोबाईलवर १५ हजार रुपये पाठवले. त्यानंतर धानम्मा बिराजदार हिने माझ्या अकाउंटवर पैसे आले नाहीत म्हणून तिथून पळ काढून निघून गेली.