टीम मंगळवेढा टाईम्स ।
राज्यातील विधानपरिषदेच्या रिक्त जागांसाठी डिसेंबर महिन्यात निवडणूक होणार आहे. जिल्ह्यात नव्याने एक नगरपंचायत तर चार नगरपरिषदा अस्तित्वात आल्या आहेत.
तर मोहोळ , माढा , माळशिरस नगरपंचायतींची मुदत संपल्याने तेथे सध्या प्रशासक आहे. त्यामुळे सोलापूर विधानपरिषदेच्या निवडणूकीत ७५ टक्के मतदार पात्र नसल्याने हि निवडणूक राज्य निवडणूक आयोगाने पुढे ढकलली आहे.
निवडणूक आयोगाच्या या निर्णयाचा फटका भाजपला बसला आहे. ‘लाभाच्या मोहाने’ या निवडणुकीकडे बहुतांशी मतदार हे लक्ष ठेवून होते.
मात्र निवडणूकच पुढे ढकलली गेल्याने अनेक मतदारांचे देव पाण्यातच राहिले आहेत. या निवडणुकीत विजयासाठी पुरेसे संख्याबळ असतानाही निवडणूक पुढे गेल्याने त्याचा राजकीय फटका भाजपला बसला आहे.
सोलापूर महानगरपालिका, सोलापूर जिल्हा परिषदेची मुदत फेब्रुवारी महिन्यामध्ये संपत आहे. त्यामुळे मतदारसंख्या सर्वाधिक असणाऱ्या जि.प.सदस्य, महानगरपालिकेतील नगरसेवक हे मतदानापासून वंचित राहणार आहेत.
सोलापूर जिल्ह्यातील मोहोळ, माढा, माळशिरस येथील नगरपरिषद व नगरपंचायतींची मुदती संपली आहे. त्यामुळे तेथे सध्या प्रशासक कार्यरत आहेत.
तर जिल्ह्यात नव्याने अकलूज नगरपरिषद, नातेपुते, श्रीपूर-महाळुंग, वैराग, अनगर या चार नगरपंचायतींची निर्मिती करण्यात आली आहे.
या निर्णयाचा फटका सोलापूर विधानपरिषद निवडणूक पुढे जाण्यावर बसला आहे. सध्याच्या स्थितीत ४१ ९ एकूण मतदारांपैकी ९ मतदार अपात्र झाले होते. या नऊपैकी काहींचे निधन झाले असून विविध कारणांमुळे काहींचे पद गेले आहे.
अस्तित्वात असणाऱ्या ४१० मतदारांपैकी ३०० च्या वर मतदार हे भाजपाशी संबंधित आहेत. तर काँग्रेस – राष्ट्रवादी व शिवसेनेशी संबंधीत ११० मतदार आहेत.
त्यामुळे विजयासाठी भारतीय जनता पक्षाचे गणित पक्के असताना विधानपरिषद निवडणूक पुढे ढकलली गेल्याने याचा फटका भाजपला बसला आहे. भाजपकडून या निवडणुकीत विद्यमान आ.प्रशांत परिचारक यांना उमेदवारी निश्चित होती.
तर महाविकास आघाडीत राष्ट्रवादीच्या वाटेला गेलेल्या या विधानपरिषद निवडणुकीत उमेदवारीच्या स्पर्धेत माजी आ.दिलीप माने, महेश कोठे, माजी आ.राजन पाटील, जि.प. सदस्य उमेश पाटील, सुधीर खरटमल यांची नावे चर्चेत होती निवडणुकीसाठी भाजपकडून जोरदार तयारी करण्यात आली होती.
मात्र, निवडणूक पुढे ढकलली गेल्याने निवडणुकीची सर्व गणिते बदलली आहेत. आता सोलापूर विधानपरिषद निवडणुकीचा कार्यक्रम मार्च नंतरच घोषित होण्याची शक्यता वर्तविण्यात येत आहे.(स्रोत:पुण्यनगरी)
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
