दीड महिन्यांपूर्वी मुंगशी (ता. बार्शी) येथून पुराच्या पाण्यात वाहून गेलेल्या शेतकऱ्याचा मृतदेह बुधवारी मोहोळ तालुक्यातील देगाव (वा) गावच्या शिवारात सडलेल्या अवस्थेत आढळून आला.
निवृत्ती रंगनाथ ताटे (वय ६८ रा. मुंगशी ता. बार्शी) असे मृत शेतकऱ्याचे नाव आहे. या घटनेची नोंद मोहोळ पोलिसात करण्यात आली आहे.
या बाबत मोहोळ पोलिस सूत्रांकडून मिळालेली अधिक माहिती अशी की, निवृत्ती रंगनाथ ताटे यांची मुंगशी गावात नागझरी नदीकाठी शेत जमीन आहे.
दि.२४ ऑक्टोंबर रोजी ताटे हे नेहमीप्रमाणे शेतीची कामे करण्यासाठी शेतात गेले होते. मात्र मुसळधार पाऊस झाल्याने नागझरी नदीला महापूर आला होता.
पुराच्या पाण्याने वेढले गेल्यामुळे ते पाण्याच्या प्रवाहात वाहून गेले. त्यामुळे कुटुंबातील सदस्य व गावातील नागरिकांनी त्यांचा सर्वत्र शोध घेतला होता.
मात्र ते कुठेच मिळून आले नव्हते. त्यामुळे वैराग पोलिस ठाण्यात मिसिंग केस दाखल करण्यात आली होती.दरम्यान बुधवारी (२५ नोव्हेंबर) मोहोळ तालुक्यातील देगाव (वा) येथील शेतकरी कुमार दत्तात्रय कादे यांच्या शेतात पुरुष जातीचा एक मृतदेह सडलेल्या अवस्थेत आढळून आला.
घटनेची माहिती मिळताच मोहोळ पोलिसांनी घटनास्थळी धाव घेत पाहणी केली. सदरचा मृतदेह सडून फक्त सांगडाच राहिला होता. यावेळी पोलिसांनी मोहोळसह जिल्ह्यातील अन्य पोलिस ठाण्याच्या हद्दीतून मिसिंग असलेल्या लोकांची माहिती घेतली असता, निवृत्ती ताटे हे मुंगशी (ता. बार्शी) येथून दीड महिन्यांपूर्वी पुरात वाहून गेलेल्या समजले.
त्यानुसार मोहोळ पोलिसांनी त्यांच्या नातेवाईकांना बोलावून मृतदेहाची ओळख पटविण्यास सांगितले. यावेळी मृत इसमाच्या गळ्यात असलेली तुळशीची माळ व शरीराच्या ठेवणीवरून सदरचा मृतदेह निवृत्ती ताटे यांचाच असल्याचे त्यांच्या नातेवाईकांनी ओळखले.
या प्रकरणी मयत निवृत्ती ताटे यांचे जावई बापुराव अर्जुन क्षीरसागर (रा. मुंगशी) यांनी दिलेल्या माहितीवरून मोहोळ पोलिसात अकस्मात मृत्यूची नोंद करण्यात आली आहे. या घटनेचा पुढील तपास हेड कॉन्स्टेबल पोफळे हे करीत आहेत. या दुर्दैवी घटनेमुळे मुंगशी परिसरात हळहळ व्यक्त केली जात आहे.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज