टीम मंगळवेढा टाईम्स ।
दगडखाणीत उताराला चालू टिप्परचे हँडब्रेक लावून काम करताना ब्रेक निसटून ते मागे आल्याने एका मजुराचा मृत्यू झाला. सोमवारी (दि.११) रात्री साडेआठच्या सुमारास मंगळवेढा तालुक्यातील लोणार येथे ही दुर्घटना घडली.
भिवदास रघुनाथ चोरमुले (वय २२, लोणार ) असे मरण पावलेल्या मजुराचे नाव आहे. लोणार येथील शासकीय इनाम जमिनीतील खाणीत मजुर भिवदास चोरमुले हा वाहनात दगड भरण्याचे इनाम काम करत होता . अचानक टिप्पर नादुरुस्त झाला.
त्यामुळे उताराला लावलेल्या चालू टिप्परचे हँडब्रेक लावून तो जॉईंट दुरुस्तीचे काम करीत होता. तेव्हा हँडब्रेक निसटून टिप्पर उतारामुळे मागे आली. त्याचे चाक भिवदास याच्या पायावरुन गेल्याने त्यात तो गंभीर जखमी होऊन मरण पावला.
त्याचा भाऊ आबासाहेब रघुनाथ चोरमले याने फिर्याद दिली. याप्रकरणी पोलिसांनी अकस्मात मृत्यूची नोंद केली आहे.
पोलिसांना न कळवताच अंत्यसंस्काराची तयारी
या अपघाताची पोलिसांना खबर न देताच अंत्यसंस्कार करण्याची तयारी सुरू होती . निनावी फोनवरून पोलिसांना याची माहिती मिळाली. त्यानंतर पोलिसांनी तात्काळ पोलिस पाटील यांना अंत्यसंस्कार थांबवून खबर देण्यास सांगितले. पोलिसांत नोंदीनंतर भोसे येथील प्राथमिक आरोग्य केंद्रात मृताचे शवविच्छेदन करण्यात आले.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
