मंगळवेढा टाईम्स वृत्तसेवा:-
वडूज येथील माजी उपनगराध्यक्ष तथा नगरसेवक संदीप निवृत्ती गोडसे यांनी नगराध्यक्ष सुनील हिंदुराव गोडसे यांच्यासह सहा जणांविरोधात सावकारकीसह अपहरणाची तक्रार वडूज पोलिस ठाण्यात दिली आहे. संबंधितांवर दोन्ही कलमांन्वये गुन्हा दाखल झाल्याने वडूज परिसरात खळबळ उडाली आहे.
सुनील गोडसे, विपुल गोडसे, जयवंत पाटील, राजेंद्र चव्हाण, सचिन माळी, संदीप किसन गोडसे, प्रदीप किसन गोडसे (सर्व रा. वडूज), अशी संशयितांची नावे आहेत.संदीप निवृत्ती गोडसे यांनी वडूज पोलिस ठाण्यात दिलेल्या तक्रारीत म्हटले आहे की, मला जून 2014 मध्ये लोकांचे देणे भागवण्यासाठी व औषधोपचारासाठी पैशाची गरज असल्याचे नगराध्यक्ष सुनील हिंदुराव गोडसे, सचिन तुकाराम माळी, जयवंत माधवराव पाटील यांना बोलून दाखवले होते.
त्यावेळी सुनील गोडसे यांनी तुम्हाला रक्कम उसनवार देतो, तुम्ही सवडीने परत करा. नाममात्र वार्षिक 15 टक्क्यांप्रमाणे व्याज द्या, असेही त्यांनी सांगितले. त्यांनी दि. 22 मार्च 2019 रोजी सुनील गोडसे यांच्याकडून आई व वडिलांच्या दवाखान्यासाठी 9 लाख रुपये पत्नी नम्रता गोडसे यांच्या नावे चेक देऊन रक्कम व्याजाने घेतली होती. या रकमेच्या व्याजापोटी नम्रता गोडसे यांच्या गळ्यातील सर्व सोन्याचे दागिने बँकेत गहाण ठेवून व पैसे जमवून व्याजापोटी सुनील गोडसे यांना दिले होते. तसेच जेसीबी खरेदीसाठी सुनील हिंदुराव गोडसे यांच्याकडून 11 लाख रुपयांची मदत मागितली होती. ही रक्कम वडूज शाखेच्या कराड अर्बन बँकेच्या खात्यातून संदीप गोडसे यांना दिले.
या रकमेपोटी वेळच्या वेळी व्याज दे, असे बजावले. त्यानंतर 20 जानेवारी रोजी 23 लाख रुपये सुनील गोडसे यांना जगदीश विठ्ठल गोडसे यांच्या समक्ष परत केले. तद्नंतर दि. 14 जून 2019 रोजी वडूज नगर पंचायतीच्या नगराध्यक्ष पदासाठीची निवडणूक लागली. त्यावेळी नगराध्यक्ष पदासाठी सुनील गोडसे यांनी जर तु मला मदत केली नाही तर मला उसनवार घेतलेल्या रक्कमेचे सावकारी पध्दतीने जादा व्याजाची रक्कम द्यावी लागेल, अशी धमकी दिली. तसेच माजी उपनगराध्यक्ष विपुल गोडसे, जयवंत पाटील, राजेंद्र चव्हाण, सचिन माळी सर्व (रा. वडूज) यांनी संदीप गोडसे यांना उचलून नेवून हरणेबंदर, कोल्हापूर, पुणे, लोणावळा, महाबळेश्वर, सातारा या ठिकाणी ठेवले होते.
त्या दरम्यान संदीप किसन गोडसे व प्रदिप किसन गोडसे (दोन्ही रा.वडूज) यांनी संदीप गोडसे यांच्या घरावर लक्ष ठेवून सतत घरातील लोकांना भितीच्या छायेखाली ठेवले होते. नगराध्यक्षपदी सुनील गोडसे निवडून आल्यानंतर उसनवार घेतलेल्या रक्कमेची जादा आकारणी करुन त्यासाठी धमकीचे फोन करत आहेत. तसेच जयवंत पाटील गावात आल्यावर अडवून तुम्ही सुनील गोडसे यांचे पैसे परत द्या, असे म्हणून तसेच आमचे विरुध्द तक्रार दिल्यास जीवे मारण्याची धमकी दिली आहे.
सर्व रक्कम त्यांना परत दिली असताना आता विनाकारण नाहक पैशाच्या वसुलीसाठी त्रास देत आहेत. तसेच कुटंबियांना गुंडाच्या मदतीने वारंवार जीवे मारण्याची व घर सोडून जाण्याची धमकी देत आहेत. संदीप किसन गोडसे, प्रदिप किसन गोडसे हे घरी येवून सुनील गोडसे यांचे पैसे परत दे नाहीतर आता व्याजाचे पैसे दे, असे म्हणून मला व आमच्या घरातील लोकांना दगड व काठ्यांनी मारहाण केली आहे. 21 फेब्रुवारी रोजी सकाळी साडेदहा वाजण्याच्या सुमारास सुनील गोडसे, विपुल गोडसे, जयवंत पाटील, राजेंद्र चव्हाण, सचिन माळी, सदिप किसन गोडसे, प्रदीप किसन गोडसे (सर्व रा.वडूज) यांनी आपसात संगनमत करुन घरी येवून व्याजाची रक्कम देत जा नाहीतर तुला जिवंत ठेवणार नाही अशी धमकी दिल्याचे संदीप निवृत्ती गोडसे यांनी तक्रारीत म्हटले आहे. त्यानुसार नगराध्यक्षासह सहा जणांच्या विरोधात सावकारकी व संगनमताने अपहरण केल्याची नोंद वडूज पोलिस ठाण्यात झाली असून सदर घटनेचा अधिक तपास पो. नि. अशोक पाटील करत आहेत.
जगभरातील लाखो वाचक असलेले सोलापूर जिल्ह्यातील सर्वाधिक लोकप्रिय व विश्वासार्ह न्यूज पोर्टल www.mangalwedhatimes.in
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
