टीम मंगळवेढा टाईम्स ।
सोलापूर महापालिका क्षेत्रातील सर्व दुकाने आजपासून सकाळी ७ ते दुपारी २ या वेळेत खुली करण्यास महापालिका आयुक्त पी.शिवशंकर यांनी गुरुवारी रात्री परवानगी दिली. शनिवार व रविवारी दुकाने बंद असतील.
शहरात लॉकडाऊनचे निबंध कायम राहिल्याने व्यापारी, कामगार नेते रस्त्यावर उतरले होते. या पार्श्वभूमीवर राज्य सरकारने महापालिकेला स्वतंत्र प्रशासकीय घटक म्हणून मान्यता दिली आणि आयुक्तांना निर्णयाचे अधिकार दिले. त्यानुसार आयुक्त पी.शिवशंकर यांनी गुरुवारी रात्री आदेश जारी केले.
शुक्रवार सकाळपासून व्यापारपेठ खुली होत आहे. परंतु, दुकानांची वेळ निश्चित करण्यात आली आहे. दुपारी ३ वाजल्यानंतर शहरात संचारबंदी असेल. अत्यावश्यक कारणांशिवाय फिरता येणार नाही.
हे सुरू असेल सुरू राहतील.
सर्व बँका सकाळी ७ ते दुपारी २ या वेळेत सुरू राहतील. हॉटेल, रेस्टॉरंट व बार हे पार्सल सेवेकरिता सकाळी ७ ते दुपारी २ वाजेपर्यंत सुरू राहतील. दुपारी २ ते रात्री ८ पर्यंत फक्त घरपोच सेवा.
मद्य विक्री, रेशन दुकाने, केशकर्तनालये, इलेक्ट्रिक-इलेक्ट्रॉनिक्स, गॅरेज , कपडे यासह इतर सर्व दुकाने सकाळी ७ ते दुपारी २ या वेळेत सुरू राहतील.
सर्व शासकीय कार्यालये २५ टक्के अधिकारी व कर्मचारी यांच्या उपस्थितीत – कृषी संबंधित दुकाने आणि त्यांच्याशी संबंधित आस्थापना सकाळी ७ ते दुपारी २ वाजेपर्यंत सुरू राहतील.
दुकानदारांना अट
दुकाने सुरू करताना मालक, चालक, कामगार यांची कोरोना चाचणी केलेले अहवाल असणे बंधनकारक आहे किंवा लसीकरण केलेले प्रमाणपत्र असणे बंधनकारक आहे.
यंत्रमाग, विडी उद्योगाला परवानगी पण …
यंत्रमाग, गारमेंट व विडी उद्योग यांना सकाळी ७ ते दुपारी २ वाजेपर्यंत परवानगी असेल . मात्र या कारखान्यांना कोरोनाचे नियम लागू असतील असे आयुक्तांनी म्हटले आहे.
शिवाय कोरोना चाचणी व लसीकरणाचे प्रमाणपत्र बाळगणे बंधनकारक करण्यात आले आहे. यावरुनही कारखानदार आणि प्रशासनात वाद होण्याची शक्यता आहे.
सर्व धार्मिक स्थळे, मॉल बंदच राहणार धार्मिक स्थळे , स्विमिंग पूल बंद ठेवण्याचे आदेश कायम आहेत. मंगल कार्यालयांना परवानगी आहे.
मात्र २५ जणांच्या उपस्थितीत कोरोनाचे नियम पाळून समारंभ करणे आवश्यक आहे. शॉपिंग सेंटर, मॉल सुरू करण्यास परवानगी नाही. एकल दुकानांना परवानगी आहे. त्यामुळे शहरातील शॉपिंग सेंटरमधील एकल दुकाने सुरू ठेवता येतील.
सोलापूरकरांनी सोडला सुटकेचा निश्वास
जिल्हाधिकारी आणि आयुक्तांनी शहर व जिल्ह्याला निर्णयाची मोकळीक मिळावी असा नवीन प्रस्ताव पाठविला. त्याला मंजुरी मिळणार की नाही याची धाकधुक सोलापूरकरांत होती.
पुनर्वसन मंत्र्यांनी १८ जिल्हे लॉकडाऊनमुक्त करण्याची घोषणा केली. त्यात सोलापूर तिसऱ्या टण्यात होते. पण लगेच हा निर्णय झाला नसल्याचे सरकारने जाहीर केले आणि संभ्रमात भर पडली.
सोलापूरला परवानगी मिळणार का ? असाही प्रश्न पडला.पण रात्री साडेसात वाजेच्या दरम्यान राज्य सरकारचा निर्णय आला आणी सोलापूरकरांनी सुटकेचा निश्वास टाकला.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज