सावधान! सोलापूर जिल्ह्यात बनावट कागदपत्राव्दारे सिमकार्ड तयार करून बेकायदेशीर विक्री

टीम मंगळवेढा टाईम्स ।

दुकानात सीमकार्ड खरेदी करण्यासाठी येणार्‍या ग्राहकांची कागदपत्रे स्कॅन करून, त्याच्याच नावावर घेतलेले नवीन सीमकार्ड अवैध धंदेवाल्यांना बेकायदेशीररीत्या विकणार्‍या टोळीचा पोलिसांनी पर्दाफाश केला आहे.

याप्रकरणी दुकानदारासह 6 जणांना गजाआड केले असून, 13 मोबाईल व 12 कार्डही जप्त केली आहेत.गोपाल मुंदडा (रा. बलिदान चौक) असे दुकानदाराचे नाव आहे. राजेंद्र नागनाथ मल्लूरे (वय 37, रा. भवानी पेठ, घोंगडे वस्ती), स्वामी दुर्गा वरगंटी (रा. भवानी पेठ, वैद्यवाडी), कमलकिशोर नंदकिशोर अट्टल (38, रा. गुरुदत्त चौक, घोंगडे वस्ती), नागेश सुभाष येळमेली (32, रा.शाहीर वस्ती, भवानी पेठ), महांतय्या गुरय्या स्वामी (32, रा. जंगम वस्ती, अक्कलकोट रोड), अशी सीमकार्ड खरेदी करणार्‍यांची नावे आहेत.

शहरात अवैध धंदे करणार्‍यांना दुसर्‍याच्या नावे असलेले सिमकार्ड विक्री होत असल्याच्या सायबर पोलिस ठाण्यात तक्रारी दाखल झाल्या होत्या. जोडभावी पोलिस ठाण्यात या प्रकाराबाबत गुन्हाही दाखल झाला होता.

त्याअनुषंगाने पोलिसांनी येथील बलिदान चौकातील गोपाल मुंदडा याचे खाऊघर जनरल स्टोअर्सवर छापा टाकला. दुकानाचा मालक मुंदडा हा सिमकार्ड खरेदी करण्यासाठी आलेल्या ग्राहकांचा रहिवासी दाखला, आधारकार्ड, पॅनकार्ड अशी कागदपत्रे तीन ते चारवेळा स्कॅन करून घेत होता.

त्याशिवाय एकाच ग्राहकाचे दोन ते तीन वेळा आपल्या मोबाईलवर फोटो काढून घेत होता. त्यानंतर ग्राहकास सिमकार्ड कार्यान्वित करून देत होता. ग्राहक गेल्यानंतर त्यांच्याकडून घेतलेल्या कागदपत्रांच्या व जास्त काढून घेतलेल्या फोटोआधारे तो अवैध धंदे करणार्‍यांना 400 ते 500 रूपयांना दुसर्‍यांच्या नावावरचे सिमकार्ड विकत असल्याचे प्राथमिक तपासात निदर्शनास आले.

पोलिसांनी संशयित आरोपींकडून 13 मोबाईल व 12 सिमकार्ड र् असे 75 हजार रूपयांचे साहित्य जप्त केले आहे.ही कामगिरी पोलिस आयुक्त अंकुश शिंदे, पोलिस उपायुक्त बापू बांगर, सहाय्यक पोलिस आयुक्त अभय डोंगरे यांच्या मार्गदर्शनाखाली पोलिस निरीक्षक बजरंग साळुंखे, फौजदार बायस, होटकर, हवालदार कुलकर्णी, पोलिस नाईक सचिन गायकवाड, संतोष येळे, बाबू मंगरूळे, पोलिस कॉन्स्टेबल शेख, गायकवाड, कानडे, माने व पथकाने पार पाडली.

अशी ग्राहकांची फसवणूक

सीमकार्ड खरेदी करण्यासाठी ग्राहक आला असता ओळखपत्र व रहिवासी पुराव्याची कागदपत्रे विशिष्ट मोबाईलमध्ये स्कॅन करून घेतली जात असत.

ग्राहक गेल्यानंतर त्यांच्या कागदपत्रांचा गैरवापर करून विविध कंपन्यांचे सीमकार्ड चालू करून घेतले जायचे. ती सुरू झालेली सीमकार्ड अवैध धंदे करणार्‍यांना जास्तीचे पैसे घेऊन विकली जात होती. गेल्या अनेक वर्षांपासून हा बनावटगिरीचा व्यवसाय सुरू होता.

बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.

बातम्या सर्वप्रथम जाणून घेण्याकरिता लाईक करा आमचे फेसबुक पेज