मंगळवेढा टाईम्स न्युज नेटवर्क ।
आठ वर्षांनंतर झालेल्या जिल्हा परिषद आणि पंचायत समिती निवडणुकीत आमदार समाधान आवताडे यांच्या नेतृत्वाखाली भाजपने पंचायत समितीच्या ६ जागा जिंकत ऐतिहासिक विजय संपादन केल्यानंतर आज सभापतिपदाची निवड होणार आहे.
सर्वसाधारण महिलेसाठी आरक्षित असलेल्या या खुर्चीवर चोखामेळानगर गणातील विजयी उमेदवार दीपाली आनंद ताड यांची वर्णी लागण्याची शक्यता आहे.
मंगळवेढा पंचायत समितीच्या सभापतीपदासाठी भाजपमध्ये राजकीय हालचाली वेगाने सुरू आहेत. चोखामेळानगर गणातून मोठ्या मताधिक्याने विजयी झालेल्या दीपाली ताड यांचे नाव सध्या आघाडीवर असल्याची चर्चा राजकीय वर्तुळात रंगली आहे.
त्यामुळे भाजपच्या ‘लाडक्या बहिणी’ पैकी सभापतीपदाची माळ अखेर ताड यांच्या गळ्यात पडणार का, याकडे तालुक्याचे लक्ष लागले आहे.
सभापतीपद हे सर्वसाधारण महिला प्रवर्गासाठी आरक्षित असल्याने जयश्री कवचाळे (बोराळे), मोहिनी गणपाटील (मरवडे) आणि दीपाली ताड (चोखामेळानगर) या तीन प्रमुख दावेदारांची नावे पुढे आली आहेत.
मात्र, चोखामेळानगर गणातून सर्वाधिक मतांनी निवडून येत जनतेचा ठाम कौल मिळविल्यामुळे दीपाली ताड यांचे पारडे सध्या जड मानले जात आहे. मंगळवेढा तालुक्यातील राजकारणात आ. समाधान आवताडे आणि प्रशांत परिचारक यांची स्वतंत्र ताकद असली तरी भाजप सत्तेत येण्यासाठी या दोघांचे एकत्रित समीकरण महत्त्वाचे ठरले आहे.
जिल्हा परिषद व पंचायत समिती निवडणुकीतही परिचारक समर्थकांनी आमदार आवताडे यांच्या नेतृत्वाला पाठिंबा दिल्याने या समीकरणाचा प्रभाव निर्णय प्रक्रियेतही दिसून येत आहे.
दरम्यान, परिचारक गटाच्या मोहिनी गणपाटील यादेखील सभापतीपदाच्या स्पर्धेत असल्याची चर्चा आहे. मात्र, सत्ता संतुलन आणि गटांतील समन्वय राखण्यासाठी त्यांना दुसऱ्या टप्प्यात संधी देण्याचा पर्यायही पक्षपातळीवर विचाराधीन असल्याचे बोलले जात आहे.
त्यामुळे पहिल्या टप्प्यात दीपाली ताड यांना संधी देऊन पुढील काळात मोहिनी गणपाटील यांना सभापतीपदाची जबाबदारी देण्याची शक्यता व्यक्त होत आहे.
दुसरीकडे, काँग्रेसमधून भाजपमध्ये आलेल्या जयश्री कवचाळे यांच्यामुळे रमेश भांजे यांचा विजय सुकर झाल्याने त्यांच्याही नावाची चर्चा राजकीय वर्तुळात सुरू आहे. मात्र जनाधार, मताधिक्य आणि कार्यकर्त्यांचा पाठिंबा, या बाबींमुळे सध्या दीपाली ताड यांचे नाव आघाडीवर असल्याचे मानले जात आहे.
उपसभापती पदासाठी ही नावे चर्चेत
उपसभापती पदासाठी अर्जुन मल्लाळे किंवा डॉ.अप्पा निकम यांच्या नावांचीही चर्चा सुरू आहे. आज अंतिम निर्णय स्पष्ट होण्याची शक्यता आहे. त्यामुळे मंगळवेढा पंचायत समितीच्या सत्ता समीकरणाकडे तालुक्याचे लक्ष लागले आहे.
दुपारी दोनपर्यंत निवड होणार
नूतन पदाधिकारी यांच्या स्वागतासाठी पंचायत समिती प्रशासनाची लगबग सुरू असून, सर्व तयारी केली आहे. सकाळी १० ते १२ या वेळेत सभापती अन् उपसभापतिपदासाठी अर्ज दाखल केले जाणार आहेत. त्यानंतर निवडणूक अधिकारी देशमुख यांच्या अध्यक्षतेखाली दुपारी दोन वाजता सर्व सदस्यांच्या बैठकीत या निवडी केल्या जाणार आहेत.
सर्वसाधारण महिलेला संधी मिळण्याची शक्यता
उपसभापती पदासाठी विनायक यादव इच्छुक असून त्यांना संधी मिळणार हे निश्चीत आहे. तालुक्यातील दोन जिल्हा परिषद गटात आमदार आवताडे यांनी सर्व साधारण जागेवरती ओबीसी उमेदवारांना संधी देऊन निवडून आणले आहे. पंचायत समितीच्या निवडणुकीत जातीय समीकरण बघून सर्वसाधारण जागेवर देखील ओबीसी उमेदवारांना संधी दिली आहे. जनहित विकास आघाडी (आवताडे गट) ची सत्ता असताना २०१६ ला सभापती पद हे सर्वसाधारण होते. त्यावेळी ओबीसी मतदार संघामधून निवडून आलेले प्रदीप खांडेकर, प्रेरणा मासाळ यांना संधी देण्यात आली होती. त्यामुळे सर्वसाधारण महिलेला संधी मिळण्याची शक्यता आहे.
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स“च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
