हर हर महादेव! माचणूरच्या सिद्धेश्वर यात्रेचा आजपासून शंखनाद; पाच दिवस भक्ती आणि उत्साहाचा जागर, विविध उपक्रमांची पर्वणी; भाविकांची मोठी गर्दी

टीम मंगळवेढा टाईम्स ।

तीर्थक्षेत्र माचणूर येथील श्री सिद्धेश्वर देवस्थान यात्रेला आज दि. १५ फेब्रुवारी, महाशिवरात्रीपासून उत्साहात सुरुवात होत आहे. यात्रेनिमित्त विविध धार्मिक कार्यक्रमांचे आयोजन करण्यात आले असून परिसरात भक्तिमय वातावरण निर्माण झाले आहे.

महाशिवरात्रीच्या पावन दिवशी आज पहाटे ४ वाजता तहसीलदार मदन जाधव व उद्योजक संजय आवताडे यांच्या हस्ते श्रींची महापूजा संपन्न झाली असून भाविकांसाठी मंदिर दर्शनासाठी खुले करण्यात आले आहे.

ही यात्रा महाशिवरात्रीपासून पुढील पाच दिवस सुरू राहणार आहे. रविवार दि. १५ रोजी सायंकाळी मंदिरात आरतीचा कार्यक्रम होईल.

सायं. ७ वाजता श्रींच्या पालखीचे सवाद्य गावातून मंदिराकडे आगमन होणार असून पारंपरिक भेदीक कार्यक्रम (कलगी-तुरे) सादर करण्यात येणार आहेत.

दि. १७ रोजी दुपारी २ वाजता जंगी कुस्त्यांचे आयोजन करण्यात आले आहे. तसेच दि. १९ रोजी सायंकाळी आरतीनंतर श्रींच्या पालखीची मंदिरातून माचणूर गावाकडे मिरवणूक काढण्यात येणार आहे.

यात्रेच्या यशस्वी आयोजनासाठी यात्रा कमिटीचे अध्यक्ष, माचणूर गावचे सरपंच, उपसरपंच, सर्व सदस्य तसेच मंदिर ट्रस्टीचे पदाधिकारी परिश्रम घेत आहेत.

यात्रेच्या पार्श्वभूमीवर मंदिर परिसरात विविध खेळण्यांची दुकाने, रसपानगृहे, पाळणे व अन्य साहित्याची दुकाने दाखल झाली असून यात्रेचा उत्साह शिगेला पोहोचला आहे.

दरम्यान भीमा नदी येथे पाणी उपलब्ध झाल्यामुळे भाविकांच्या स्नानाची व पिण्याच्या पाण्याची सोय झाली आहे.

यात्रेनिमित्त मंगळवेढा आगार यांच्या वतीने भाविकांच्या सेवेसाठी जादा बसची व्यवस्था करण्यात आली आहे.

पोलिस प्रशासनानेही चोख बंदोबस्त ठेवला असून कोणताही अनुचित प्रकार घडू नये यासाठी विशेष दक्षता घेतली जात आहे. यात्रा समितीच्या वतीने भाविकांनी मोठ्या संख्येने उपस्थित राहून श्रींच्या दर्शनाचा लाभ घ्यावा, असे आवाहन करण्यात आले आहे.

अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262

“मंगळवेढा टाईम्स“च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.

मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.