टीम मंगळवेढा टाईम्स ।
मंगळवेढा पोलिस ठाण्यात एका माजी सैनिकाने धुडघूस घालून पोलिस ठाण्यात शासकीय काम करणाऱ्या पोलिस हवालदार दयानंद हेंबाडे (वय ३८) यास मारहाण करून शासकीय कामात अडथळा आणल्याचा प्रकार घडला आहे.
दरम्यान, या प्रकरणी माजी सैनिक धुळदेव जगन्नाथ अनुसे (धर्मगाव रोड, मंगळवेढा) यास पोलिसांनी अटक केली आहे. दरम्यान या माजी सैनिकाने मागील तीन महिन्यापुर्वीही पोलिस ठाण्यातच कुर्हाडीच्या दांडयाने हल्ला करण्याचा प्रकार घडला होता.
पोलिस सुत्रांनी दिलेली माहिती अशी , यातील फिर्यादी हे मंगळवेढा पोलिस ठाण्यात कंपनी ऑर्डली रुममध्ये सरकारी काम करीत होते. यावेळी आरोपी धुळदेव अनुसे याने दि.१९ जुलै रोजी सकाळी १०.३० वा. पोलिस ठाण्यात येवून फिर्यादी काम करीत असलेल्या खोलीत जावून
फिर्यादीच्या छातीवर मोबाईल फेकून मारुन भिंतीवर ढकलून हाताने मारहाण करून जखमी केले.व टेबलवरील गुन्हयाची कागदपत्रे फेकून टाकली.
फिर्यादीला मारहाण आरोपी करीत असताना इतर कर्मचारी मदतीला धावून आले. त्यावेळी त्यांनाही धक्काबुक्की करून शिवीगाळी , दमदाटी केल्याचे दिलेल्या फिर्यादीत म्हटले आहे.
आरोपीने धुडघूस घालत पोलिस स्टेशन गेटवर लावलेले लाईटचे दिवेही फोडल्याचे सांगण्यात आले.
मागील तीन महिन्यापुर्वीही कुर्हाड घेवून पोलिस ठाण्यात येवून काम करीत बसलेल्या पोलिस कर्मचार्यावर याच आरोपीने कुर्हाडीच्या दांडयाने मारून जखमी करत धुडघूस घालून संगणक व इतर खिडक्यांची तावदाने फोडून शासकीय मालमत्तेचे नुकसान केले होते.
मागील दीड वर्षापुर्वीही असाच प्रकार घडला होता. हा तिसरा प्रकार असल्याने पोलिसांच्या दहशतीऐवजी एका माजी सैनिकाने धुडघूस घालून पोलिस खात्यावरच दहशत बसविण्याचा प्रकार घडत असल्याने रात्रीच्यावेळी पोलिस ठाण्यात महिला कर्मचारी काम करीत असल्यामुळे अशा घटनामुळे महिला कर्मचार्यांमधून भिती व्यक्त केली जात आहे.
पोलिस अधिक्षक तेजस्वी सातपुते यांनी याकामी लक्ष घालून भविष्यात असा प्रकार घडणार नाही याची खबरदारी घ्यावी मागणी होत आहे.अधिक तपास पोलिस हवालदार कोळी हे करीत आहेत.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
