टीम मंगळवेढा टाईम्स (विशेष प्रतिनिधी)
सोलापूर जिल्ह्याचे पालकमंत्री जयकुमार गोरे यांनी जिल्ह्यात भाजपच्या पक्षवाढीसाठी जोरदार मोर्चेबांधणी सुरू केली असतानाच, पंढरपूर-मंगळवेढा स्थानिक राजकारणातून एक मोठी बातमी समोर येत आहे.
नगरपालिका निवडणुकीत भाजपला पराभूत करत पंढरपूर-मंगळवेढ्यात सत्ता काबीज करणाऱ्या ‘तीर्थक्षेत्र विकास आघाडीत’ आता अधिकृतपणे मोठी फाटाफूट झाली आहे.
गत महिन्यात भगीरथ भालके यांनी पंढरपूरच्या नगराध्यक्ष प्रणिता भालके व इतर नगरसेवकांसह शिवसेना (शिंदे गट) पक्षात जाहीर प्रवेश केला.
या घडामोडीनंतर आता मंगळवेढ्याचे नेते आणि डीसीसी बँकेचे माजी उपाध्यक्ष बबनराव आवताडे हे आपल्या समर्थकांसह भाजपमध्ये प्रवेश करणार असल्याच्या चर्चांनी मंगळवेढ्याच्या राजकीय वर्तुळात प्रचंड जोर धरला आहे.
…आणि ‘तीर्थक्षेत्र विकास आघाडी’त खटके उडाले!
मंगळवेढा नगरपालिकेच्या निवडणुकीत भगीरथ भालके आणि बबनराव आवताडे यांनी एकत्र येत ‘तीर्थक्षेत्र विकास आघाडी’च्या माध्यमातून निवडणूक लढवली होती. या निवडणुकीत आघाडीने नगराध्यक्षपदासह ९ जागांवर विजय मिळवून सत्ता स्थापन केली होती.
मात्र, त्यानंतर स्वीकृत नगरसेवक निवडीवरून आघाडीत अंतर्गत खटके उडाले. वाद इतका टोकाला गेला की पक्षनेते बदलण्यापर्यंतची कारवाई झाली आणि येथूनच आघाडीत फूट पडायला सुरुवात झाली.
मुंबईत ‘त्या’ गुप्त भेटीमुळे चर्चेला उधाण
काही दिवसांपूर्वी बबनराव आवताडे यांनी मुख्यमंत्री देवेंद्र फडणवीस यांची मुंबईत भेट घेतली. या भेटीदरम्यान पालकमंत्री जयकुमार गोरे, मंगळवेढा खरेदी-विक्री संघाचे अध्यक्ष सिद्धेश्वर आवताडे आणि भाजपचे राजेंद्र सुरवसे उपस्थित होते.
विशेष म्हणजे, सोलापूर विधान परिषद निवडणुकीच्या पार्श्वभूमीवर संभाव्य इच्छुक उमेदवार जिल्हाध्यक्ष शशिकांत चव्हाण हे देखील या भेटीत सोबत असल्याने आवताडे यांच्या भाजप प्रवेशाच्या चर्चांना अधिक बळकटी मिळाली आहे.
मुख्यमंत्र्यांकडे मंगळवेढ्याच्या प्रलंबित प्रश्नांचा पाढा
या महत्त्वाच्या भेटीदरम्यान बबनराव आवताडे यांनी मुख्यमंत्री फडणवीस यांच्याकडे मंगळवेढ्यातील प्रलंबित विकासकामांचे निवेदन दिले. यामध्ये प्रामुख्याने मंगळवेढा शहरातील भूमिगत गटार योजना पूर्ण करणे. शहरासाठी शुद्ध पिण्याच्या पाण्याची व्यवस्था करणे. नगरपालिकेला पूर्णवेळ मुख्य अधिकारी नेमणे. महात्मा बसवेश्वर स्मारक आणि संत चोखोबा स्मारक यांचा प्रलंबित प्रश्न तातडीने सोडवणे.
विधान परिषद निवडणुकीत भाजपला मोठा फायदा?
जर बबनराव आवताडे, सिद्धेश्वर आवताडे, नगराध्यक्षा सुनंदा आवताडे आणि त्यांचे समर्थक नगरसेवक भाजपमध्ये दाखल झाले, तर आगामी विधान परिषद निवडणुकीत भाजपला याचा मोठा राजकीय फायदा होऊ शकतो, असे राजकीय विश्लेषकांचे म्हणणे आहे. या संभाव्य पक्षप्रवेशामुळे तालुक्यातील संपूर्ण राजकीय समीकरणे बदलणार हे मात्र नक्की!
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स”च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
