मंगळवेढा टाईम्स वृत्तसेवा । आईचा खून केल्याबद्दल किरण रायाप्पा बंडगे (वय 25, रा. बाज, ता. जत) याला जन्मठेप व दहा हजार रुपये दंडाची शिक्षा प्रधान जिल्हा व सत्र न्यायाधीश विजय पाटील यांनी सुनावली. सरकार पक्षातर्फे जिल्हा सरकारी वकील अरविंद रामराव देशमुख यांनी काम पाहिले.
खटल्याची पार्श्वभूमी अशी, रायाप्पा विठोबा बंडगे, पत्नी नंदाबाई, आई वैजयंता, मुले शरद, मोहन व किरण, मोठी सून कमल, नात अमृता, नातू अदित्य असे सर्वजण मिळून बाज येथे राहत होते. रायाप्पाचा मोठा मुलगा शरद त्यांची पत्नी कमल व नातू अदित्य हे ऊस तोड कामासाठी कवठेपिरान येथे गेले होते. दुसरा मुलगा मोहन हा ट्रॅक्टरवर ड्रायव्हर म्हणून बाज येथे कामाला जात होता.
किरण लहानपणापासून रागीट व भांडखोर स्वभावाचा होता. त्याला कोणीही सांगितलेले पटत नव्हते. बर्याच वेळा तो सांगणार्या व्यक्तीस मारत असे. जानेवारी 2016 मध्ये एके दिवशी सायंकाळी 5 वाजता आई किरणला म्हणाली की, ‘ऐवढा मोठा झालास तुला कळत नाही का? टॉवेलने हात-पाय पुसायचे सोडून परकरने हात-पाय पुसतोस काय’ यावर किरण संतापला होता.
रात्री 10.30 दरम्यान घरातील सर्वजण झोपी गेल्यानंतर किरणने घरातील विळ्याने आई नंदाबाई हिच्या पाठीवर, मनगटावर व छातीवर वार केले. त्यावेळी किरणची आजी वैजयंता जागी झाली. तिने आरडाओरडा सुरू केला. त्यामुळे वडील रायाप्पा हे देखील जागे झाले. त्यावेळी किरणच्या हातात रक्ताने माखलेला विळा होता. तर नंदाबाई या रक्ताच्या थारोळ्यात पडल्या होत्या. ‘तू हे काय केलेस’ अशी विचारणा रायाप्पांने मुलगा किरण यास केली. त्यावेळी किरण म्हणाला ‘म्हातार्या तुलापण आता जिवंत सोडत नाही’ किरणने वडिलांच्या मानेवर वार केला. दुसरा वार करणार तेवढ्यात मुठीतून विळा निखळून खाली पडला. त्यानंतर रायाप्पा आरडाओरडा करीत घराबाहेर पडले. त्यांच्या आवाजामुळे शेजारचे लोक जमा झाले.
शेजारील लोक घरात गेले असता किरण व त्याची आजी वैजयंता यांच्यात झटापट सुरू होती. किरण कुर्हाड घेऊन वैजयंताच्या मागे धावत होता. लोकांना पाहून किरण तेथून पळून गेला. शेजारील लोकांनी रायाप्पा व वैजयंता यांना जत येथील शासकीय रुग्णालयात उपचारासाठी दाखल केले. आई नंदाबाई हिचा जागीच मृत्यू झाला होता. रायाप्पा यांनी पोलिसात फिर्याद दिली.
पोलिसांनी किरण विरूध्द खून व खुनाचा प्रयत्न याबद्दल गुन्हा दाखल केला. सहायक पोलिस निरीक्षक सोनवलकर यांनी तपास करून आरोपपत्र दाखल केले. या खटल्यात सरकार पक्षातर्फे एकूण सहा साक्षीदार तपासण्यात आले. आजी वैजयंता यांची साक्ष महत्त्वपूर्ण ठरली.
न्यायालयाने किरण बंडगे याला आईच्या खुनाबद्दल भा.द.वि.कलम 302 अन्वये जन्मठेप तसेच वडील आणि आजी यांच्यावर खुनीहल्ला केल्याबद्दल भा.द.वि.कलम 307 अन्वये तीन वर्षे सक्तमजुरी व पाच हजार रुपये दंडाची शिक्षा न्यायालयाने सुनावली. दंड न भरल्यास प्रत्येक कलमास एक वर्ष जादा सक्तमजुरीची शिक्षा भोगण्याचे आदेश न्यायालयाने दिले.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
