‘मलाही वाटतं मुख्यमंत्री व्हावं पण…’,अजित पवारांनी पुन्हा बोलून दाखवली सल; कधी होणार पूर्ण?

मंगळवेढा टाईम्स न्युज नेटवर्क ।

महायुतीत सध्या अजित पवार उपमुख्यमंत्री आहेत सोबत त्यांच्याकडे राज्याच्या तिजोरीच्या चाव्याही आहेत. म्हणजेच महत्वाचं अर्थखातं अजित पवाराकडे आहे. मात्र तरीही अधूनमधून त्यांच्या मनाची जुनी इच्छा काही कार्यक्रमात ऐकायला मिळतेच..

मुंबईतल्या राष्ट्रवादीच्या कार्यक्रमातही अजित पवारांनी पुन्हा एकदा आपल्या मनातली इच्छो बोलून दाखवली. काय आहे ती इच्छा? जाणून घेऊया.

जिथे सत्ता तिथे अजितदादा हे समिकरण मागच्या अनेक दशकांपासून कायम राहिलंय. मग सत्ता आघाडीची असो किंवा युतीची… तिथे अजित पवार असणार हे ठरलेलं. अगदी 1990 पासून ते आता 2025 सालापर्यंत फक्त 1995 ते 99 आणि 2014 ते 2019चा अपवाद वगळता अजित पवार कायम सत्तेत राहिलेत.

इतकंच काय त्यांनी आजवर महाराष्ट्राचा सर्वाधिकवेळा उपमुख्यमंत्री होण्याचा विक्रमही केलाय. मात्र तरीही अजित पवारांच्या मनात कायम एक सल बोचत राहते.. मुंबईतल्या राष्ट्रवादी काँग्रेसच्या गौरवशाली महाराष्ट्र कार्यक्रमात त्यांनी ही सल बोलून दाखवली.

महाराष्ट्राला महिला मुख्यमंत्री मिळायला हवी असं म्हणत असतानाच मलाही वाटतं मुख्यमंत्री व्हावं मात्र कुठं झालो असं म्हणत त्यांनी आपली दुखरी नस बोलून दाखवली. इतकंच नाही तर आपणही एक दिवस महाराष्ट्राचा मुख्यमंत्री होऊ असा विश्वासही त्यांनी भाषणात बोलून दाखवला.

अजित पवारांच्या याच विधानावरुन आता जोरदार चर्चा सुरु झाल्यात. यावर त्यांच्याच थोरल्या मित्रपक्षाने टोला लगावलाय. अजित पवार हे कायमस्वरूपी उपमुख्यमंत्री आहेतच असं भाजपचे परिणय फुके म्हणालेत.

‘मुख्यमंत्रीपदाची महात्वाकांक्षा कुणीही बाळगू शकतो’

दुसरीकडे भाजपसोबत राहून अजित पवार कधीच मुख्यमंत्री होऊ शकत नाही असा दावा शिवसेना ठाकरे गटाचे खासदार संजय राऊतांनी केलाय. सोबत त्यांनी त्यावरचा उपायही सांगून टाकलाय. यावर अजित पवारांचे धाकटे मित्रपक्ष शिवसेना शिंदे गटाची छोटीशीच प्रतिक्रिया अतिशय बोलकी आहे.

शिवसेना मंत्री गुलाबराव पाटलांना अजित पवारांच्या या विच्छेबद्दल विचारल्यावर त्यांनी मोजून चारच शब्दात उत्तर दिलंय. गुलाबरावांनी चिमटा काढला असला तरी मुख्यमंत्रीपदाची महात्वाकांक्षा कुणीही बाळगू शकतो असं म्हणत संजय शिरसाट यांनी अजित पवारांच्या वक्तव्याची पाठराखण केलीय.

शिंदेंप्रमाणं अजित पवारांसाठीही मुख्यमंत्रीपदाचं स्वप्न दिवास्वप्न?

सत्ता कुणाचीही आली तरी त्या सत्तेत सहभागी होण्याचं भाग्य आजवर अजित पवारांना लाभलंय. आजवर तब्बल 5 वेळा उपमुख्यमंत्री होण्याचा विक्रमही त्यांच्या नावावर आहे. सध्याही महायुतीत आमदार संख्येच्या मानाने अर्थखात्यासह महत्त्वाची खाती आपल्या पक्षाकडे ठेवण्यात अजित पवार यशस्वी ठरलेत.

तसंच महायुतीत मुख्यमंत्री देवेंद्र फडणवीसांचं एकनाथ शिंदेंपेक्षा अजित पवारांशी गुळपीठ अधिक असल्याचं दिसतं. तरिही आपण मुख्यमंत्री व्हावं ही अजित पवारांची मनिषा कधी लपून राहिली नाही. मात्र शिंदेंप्रमाणं अजित पवारांसाठीही मुख्यमंत्रीपदाचं स्वप्न सद्यस्थितीत दिवास्वप्न असल्याचंच दिसतंय.