मंगळवेढा टाईम्स वृत्तसेवा:-
अज्ञात कारणावरून दिपाली सुरेश येलपले (वय ५३रा.यलमार मंगेवाडी ता.सांगोला) या महिलेचा अज्ञात इसमाने खून केल्याची घटना घडली आहे.
महिलेचा गळा दाबून अथवा अन्य प्रकारे खून करून पुरावा नष्ट करण्याच्या उद्देशाने घराला बाहेरून कुलूप लावले. फोन लागत नसल्याने मयत महिलेची मुलगी घरी आल्यानंतर खुनाचा प्रकार उघडकीस आला.याबाबत मयत महिलेच्या मुलीने दिलेल्या फिर्यादीत विजय गुरव यांच्यावर संशय व्यक्त केला आहे.
याबाबत मिळालेली माहिती अशी,यलमार मंगेवाडी ता.सांगोला येथील मयत महिला दिपाली सरेश येलपले यांच्या पतीचे गेल्या वर्षी निधन झाले होते. त्यांचा मुलगा रामहरी हा आसाम येथे सोन्याच्या दकानात कारागीर म्हणून काम करत आहे.तर एक मुलगी निशा विभुते या आटपाडी पोलीस ठाण्यात पोलीस शिपाई म्हणून दुसरी मुलगी आशा विजय लोकरे या मुंबई पोलीस दलात कार्यरत आहेत.
शेतातील मोटर चालू करण्यासाठी गावातीलच विजय गुरव हा घरी येतजात होता.६ फेब्रुवारी रोजी मयत महिलेच्या पतीचे वर्षश्राद्ध असल्याने मुलगा, मुलगी व जावई आले होते.१८ फेब्रुवारी रोजी दुपारी ३ च्या सुमारास मयत दिपाली येलपले यांनी मुलगी निशा विभुते यांना फोन करून तू कधी येणार आहेस,आपल्या घराला ग्रिल बसवणारा व्यक्ती येऊन गेला होता असे सांगितले.त्यानंतर निशा विभूते यांनी आईच्या फोनवर फोन केला असता फोन लागला नाही.१८ फेब्रुवारी रोजी सकाळी दहाच्या सुमारास निशा विभुते यांनी आईच्या शेजारी राहणारे सुरेखा येलपले यांना फोन करून आईचा फोन लागत नाही, ती काय करत आहे ते पाहून मला फोन करा असे सांगितले.
यावर सुरेखा यांनी घराला बाहेरून कुलूप आहे तसेच कालपासून तुझी आई नसल्याचे सांगितले. यावर विभूते यांनी सर्व नातेवाईकांना फोन करून आईबद्दल विचारपूस केली परंतु आईचा कोठेही ठावठिकाणा लागत नसल्याने त्या पतीसोबत यलमार मंगेवडी येथे आल्या.आईच्या दोन्ही चपला घराबाहेर असल्याने खिडकी उघडून पाहिली. आई अंथरुणावर झोपलेल्या स्थितीत दिसल्याने आवाज दिला परंतु,प्रतिसाद मिळाला नाही.आसपासच्या लोकांनी कटावणीने कुलूप तोडून घरात जाऊन पाहिले असता दिपाली येलपले यांच्या तोंडातून रक्त येत होते व अंगाला मुंग्या लागल्या होत्या.
यावर निशा विभूते यांनी चुलती लता येलपले यांना माझ्या आईकडे लक्ष द्यायचे नाही का अशी विचारणा केली. त्यावर त्यांनी १८ फेब्रुवारी रोजी रात्री बाराच्या सुमारास तुझ्या आईचा व एका माणसाचा मोठ – मोठ्याने भांडणाचा आवाज ऐकू येत असल्याचे सांगितले.
याबाबत मयत महिलेची मुलगी निशा विभूते यांनी सांगोला पोलीस ठाण्यात फिर्याद दिली आहे.
जगभरातील लाखो वाचक असलेले सोलापूर जिल्ह्यातील सर्वाधिक लोकप्रिय व विश्वासार्ह न्यूज पोर्टल www.mangalwedhatimes.in
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
