मोठी बातमी! कमी पटसंख्येच्या शाळांवर आता कंत्राटी शिक्षकांची नियुक्ती होणार, सोलापूर जिल्ह्यात ‘इतक्या’ शाळा; २० पटाच्या आतील शाळेत राहणार एकच शिक्षक

टीम मंगळवेढा टाईम्स ।

राज्यातील स्थानिक स्वराज्य संस्थांच्या २० किंवा २० पेक्षा कमी पटसंख्या असलेल्या शाळांमध्ये मंजूर करण्यात आलेल्या दोन शिक्षकांपैकी एक सेवानिवृत्त शिक्षक किंवा डीएड, बीएड पात्रताधारक बेरोजगार शिक्षकांची नियुक्ती करण्यात येणार आहे. त्याबाबतचा अध्यादेश राज्याच्या शालेय शिक्षण विभागातर्फे नुकताच प्रसिद्ध करण्यात आला आहे.

या कंत्राटी शिक्षकाला १५ हजार रुपये एवढे मानधन दिले जाणार आहे. २० पेक्षा कमी पटसंख्या असलेल्या सोलापूर जिल्ह्यातील १८९ शाळांवर कंत्राटी शिक्षकाची नियुक्ती होणार आहे.

कमी पटसंख्या असलेल्या शाळांमधील विद्यार्थ्यांचे शैक्षणिक नुकसान होऊ नये, या उद्देशाने हा निर्णय घेण्यात असल्याचे अध्यादेशात म्हटले आहे. नियुक्त केल्या जाणाऱ्या सेवानिवृत्त शिक्षकाची कमाल वयोमर्यादा ७० वर्ष राहील.

मान्यताप्राप्त शिक्षण संस्थेतून नियत वयोमानानुसार सेवानिवृत्त झालेल्या शिक्षकाचीच नियुक्ती केली जाईल. कंत्राटी पद्धतीवर नियुक्त केल्या जाणाऱ्या शिक्षकाला केवळ एक वर्षाचा कालावधी दिला जाईल.

त्यानंतर त्याची गुणवत्ता व योग्यता विचारात घेऊन नियुक्तीच्या कालावधीमध्ये वाढ करण्यात येईल. मात्र, ही वाढ तीन वर्षापेक्षा जास्त असणार नाही.

दोन शिक्षक असतील तर एकाची होणार बदली

ज्या २० व २० पेक्षा कमी पटसंख्येच्या जिल्हा परिषद शाळांमध्ये दोन नियमित शिक्षक कार्यरत आहे. त्यातील एका शिक्षकाची जास्त पटसंख्या असलेल्या शाळांमध्ये समुपदेशाने बदली करावी. ही बदली करताना दोन्ही शिक्षकांची संमती घ्यावी. तसेच कंत्राटी शिक्षक शाळेत नियुक्त होत नाही. तोपर्यंत बदली करू नये, असेही या अध्यादेशात नमूद करण्यात आले आहे.

सेवानिवृत्त शिक्षकांना मिळणार काम..

२० पेक्षा कमी पटसंख्या असलेल्या शाळांवर आता सेवानिवृत्त शिक्षक नियुक्त केले जाणार आहेत. महिन्याला १५ हजार मानधन त्यांना दिले जाणार आहे. तसे आदेश शिक्षक दिनी काढण्यात आले आहेत. हा आदेश शासनस्तरावर झाला असून त्याबाबत अद्याप स्थानिक शिक्षण विभागाकडे कोणतेच निर्देश, सूचना किंवा परिपत्रक प्राप्त झाले नसल्याचे सांगण्यात आले.

वाडीवस्तीवरील, पाड्यावरील, तांड्यावरील शाळांचे व बहुजन समाजातील विद्यार्थ्यांचे शैक्षणिक भवितव्य धोक्यात असून, भविष्यात वाडी वस्तीवरील शिक्षण देणारी व्यवस्था म्हणजेच प्राथमिक शाळा बंद पडण्याची भीती आहे.

शिक्षक दिनी जारी केलेला शासन निर्णय रद्द करावा यासाठी सर्व शिक्षक संघटनेच्या वतीने लढा उभा केला जाईल. – नीलेश देशमुख, राज्य सरचिटणीस, शिक्षक सहकार संघटना.(स्रोत:लोकमत)

राज्यातील व देशातील ब्रेकिंग बातम्या आणि माहिती सर्वात प्रथम तुमच्या पर्यंत .आजच Add करा तुमच्या Whatsapp ग्रुपवर 99 70 76 6262 हा आमचा नंबर.