धक्कादायक! पत्नी सोडचिठ्ठी देत नसल्याच्या रागातून मामाचा खून; सोलापूर जिल्ह्यातील घटना

मंगळवेढा टाइम्स न्यूज नेटवर्क ।

मामाच्या सांगण्यावरूनच पत्नी सोडचिठ्ठी देत नसल्याचा संशय असल्याने आणि मागील भांडणाचा राग मनात ठेवून पटवर्धन कुरोली (ता. पंढरपूर) येथील देविदास नाईकनवरे यांचा खून करण्यात आल्याची घटना गुरुवारी सकाळी घडली.

याबाबत करकंब पोलिसांकडून मिळालेल्या माहितीनुसार, पंढरपूर तालुक्यातील पटवर्धन कुरोली येथील देविदास नाईकनवरे यांची भाची प्रियंका हिचे ७ वर्षांपूर्वी गावातीलच सिद्धेश्वर नाईकनवरे यांच्यासोबत लग्न झाले होते.

मात्र प्रियंकाला शेतातील काम जमत नसल्यामुळे तिला सासरी पती आणि सासू-सासरे हे जाच करत होते, तसेच सोडचिठ्ठी देण्यासाठी दबाव आणत होते. प्रसंगी मारहाणही करत होते.

असेच एकदा सासरी प्रियंकाला मारहाण झाल्याचे समजताच मामा देविदास नाईकनवरे हे आपला चुलत भाऊ सचिन नाईकनवरेसह प्रियंकाच्या सासरी जाऊन प्रियंकाला मारहाण का केली? याचा जाब विचारला होता. त्यावेळी सासरा ब्रह्मदेव नाईकनवरे आणि पती सिद्धेश्वर नाईकनवरे यांच्यासोबत त्यांची बाचाबाची होऊन मारहाणही झाली होती.

या घटनेचा राग मनात ठेवून ब्रह्मदेव नाईकनवरे याने एखाद्या दिवशी देविदासला मुंगीसारखा चिरडून टाकीन, अशी धमकीही दिली होती. गुरुवारी सकाळी दहा वाजता पटवर्धन कुरोली – आव्हे रस्त्यावर देविदास नाईकनवरे नाईकनवरे हे

आपल्या फॅशन मोटारसायकल (क्र. एमएच १३ / सीके ९६४१) वरून गावातून शेतातील घराकडे जात असताना ब्रह्मदेव नाईकनवरे याने त्यांच्या बोलेरो गाडी (क्र. एमएच १३ / डीएन ८९८४ ) ने जोरात येऊन

देविदासच्या गाडीला पाठीमागून धडक देऊन त्यास खाली पाडले तसेच शंभर ते दीडशे फूट फरपटत नेले. ही घटना घडत असताना प्रत्यक्षदर्शी राहुल नाईकनवरे यांनी ब्रह्मदेव नाईकनवरे यास अटकाव करण्याचा प्रयत्न केला.

मात्र ब्रह्मदेव नाईकनवरे यांनी गाडी पाठीमागे घेऊन पुन्हा एकदा देविदास नाईकनवरे यांच्या अंगावर घातली. यात जबर जखमी झालेल्या देविदास नाईकनवरे यांना पंढरपूर येथील रुग्णालयात उपचारार्थ दाखल केले असता तिथे त्यांना मृत घोषित करण्यात आले.

याबाबत ब्रह्मदेव नाईकनवरे आणि सिध्देश्वर नाईकनवरे यांच्याविरुद्ध करकंब पोलीस ठाण्यात गुन्हा दाखल करण्यात आला आहे.

बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.

बातम्या सर्वप्रथम जाणून घेण्याकरिता लाईक करा आमचे फेसबुक पेज