सकल मराठा समाजाची आरक्षण संदर्भात मंगळवेढ्यात आज बैठक

मंगळवेढा टाईम्स टीम ।

मराठा आरक्षण विचारविनिमय संदर्भात चर्चा विचारविनिमय करण्यासाठी आज दि.२८ जून सोमवार रोजी दुपारी ३ वाजता संत दामाजी मंदिर येथे मराठा समाजाची महत्त्वपूर्ण बैठक आयोजित केली आहे.

सर्वोच्च न्यायालयात मराठा समाजाचे आरक्षण रद्दबातल झाल्यानंतर समाजाच्या सर्वच स्तरातून तीव्र प्रतिक्रिया उमटत आहेत. वर्षानुवर्षे दारिद्रयात खितपत पडलेल्या व इतर समाजबांधवांना मोठ्या भावाच्या भूमिकेतून न्याय मिळवून देणाऱ्या मराठा समाजाला आरक्षण मिळावे,

यासाठी रविवार दि.४ जुलै रोजी सकाळी ११ वाजता सोलापूर येथे शहर व जिल्ह्याच्यावतीने मराठा क्रांती आक्रोश मोर्चाचे आयोजन केले आहे.

मराठा आरक्षणासंदर्भात मागण्या करण्यात आलेल्या आहेत? यापुढील आरक्षणाची लढाई काय असणार आहे ? यासह सोलापुरातील मराठा क्रांती आक्रोश मोर्चा संदर्भात मंगळवेढा तालुक्यातून काय नियोजन होणार आहे ?

यासह विविध विषयांवर चर्चा व विचारविनिमय करण्यासाठी आजच्या बैठकीत अण्णासाहेब पाटील आर्थिक विकास महामंडळाचे माजी अध्यक्ष आमदार नरेंद्र पाटील उपस्थित राहणार आहेत.

या बैठकीला सर्व समाजबांधवांनी वेळेवर उपस्थित राहावे , असे आवाहन सकल मराठा समाज मंगळवेढा तालुका समन्वय समितीच्या वतीने करण्यात आले आहे.

राज्यातील व देशातील ब्रेकिंग बातम्या आणि माहिती सर्वात प्रथम तुमच्या पर्यंत .आजच Add करा तुमच्या Whatsapp ग्रुपवर 99 70 76 6262 हा आमचा नंबर.