मंगळवेढा टाईम्स वृत्तसेवा:-
शिक्षकाने सातवीच्या विद्यार्थिनींना अश्लील व्हिडिओ व फोटो दाखवून त्यांचा विनयभंग केला. सिडको पोलिस ठाण्याजवळ असलेल्या एका नामवंत शाळेत हा प्रकार घडला.
शाळा प्रशासनाने शिक्षकाला पाठीशी घातल्यानंतर विद्यार्थिनींनी थेट शिक्षणमंत्री, महिला आयोग व पोलिस आयुक्तांना पत्र लिहून या गंभीर प्रकरणात लक्ष घालण्याची मागणी केली. त्यानंतर दोन दिवसांपासून शाळेत विशेष पथकाकडून चौकशी सुरू असून मुलींना विश्वासात घेतल्यानंतर त्यांनी आपबीती सांगितली.
दरम्यान, या प्रकरणात पालकांना तक्रार करण्याचे आवाहन पोलिस पथकाकडून करण्यात आले. परंतु, आधी आक्रमक असलेल्या पालकांनी नंतर नकार दिला
पोलिस सूत्रांकडून मिळालेल्या माहितीनुसार, सिडको पोलिस ठाण्याच्या हद्दीत असलेल्या आणि वेगवेगळ्या सत्रांमध्ये भरणाऱ्या या शाळेत हजारो विद्यार्थी शिक्षण घेतात. सातवीच्या वर्गात शिकणाऱ्या काही मुलींवर येथील एका शिक्षकाची वाईट नजर पडली. त्याने मुलींना अश्लील व्हिडिओ, फोटो दाखविले. तसेच, त्यांच्याशी लगट करण्याचा प्रयत्न केला.
हा प्रकार अल्पवयीन मुलींना किळसवाना वाटला. त्यामुळे मुली प्रचंड घाबरल्या. त्यांनी हा प्रकार शाळेतील शिक्षिकांच्या कानावर घातला. प्रकरणाचे गांभीर्य ओळखून शिक्षिकांनी तत्काळ मुख्याध्यापकांशी चर्चा करून कारवाईची मागणी केली. परंतु, त्यांच्याकडून काहीही कारवाई झाली नाही. त्यामुळे शिक्षिका आणि मुलींनी संस्थाचालकांशी चर्चा केली. कारवाईची मागणी केली असता त्यांनी शिक्षकांनाच अरेरावी करून गप्प बसविले. त्यांनी शिक्षिकांचाही आवाज दाबून प्रकरण संपविण्याचा प्रयत्न केला.
शिक्षकाची बदली
सकाळच्या सत्रात सातवीच्या विद्यार्थ्यांना शिकविणाऱ्या या शिक्षकाची शाळेने दुपारच्या सत्रात भरणाऱ्या पहिली ते पाचवीच्या वर्गावर बदली केली. परंतु, त्यामुळे हा शिक्षक सुधारेल याची काहीही शाश्वती नाही. महत्त्वाचे म्हणजे, सातवीच्या मुली किमान पुढे आल्या. पहिली ते पाचवीच्या मुलींशी हा प्रकार घडला तर त्या बोलू शकत नाहीत. त्यामुळे या शिक्षकाविरुद्ध कायदेशीर कारवाई झालीच पाहिजे, असा सूर पालकांमधून उमटत आहे.
दोन दिवसांपासून चौकशी सुरू
पोलिस आयुक्तालयात पत्र मिळाल्यानंतर विशेष पथकामार्फत चौकशी सुरू करण्यात आली. पथकाने सलग दोन दिवस शाळेत भेट दिली. नियमित भेट असल्याचे सांगून त्यांनी मुली आणि शिक्षिकांशी बंद खोलीत चर्चा केली. तेव्हा मुलींनी रडत आपबीती सांगितली. यावेळी काही मुली गैरहजर असल्याचे समोर आल्यावर पथकाने घरी जाऊन मुली आणि त्यांच्या पालकांना विश्वासात घेत विचारपूस केली. तोपर्यंत पालकही अनभिज्ञ होते.
म्हणे, मुलींनीच ‘तशी’ माहिती विचारली
मुलींशी अश्लील वर्तन करणाऱ्या शिक्षकाची तक्रार केल्यानंतर शाळा प्रशासनाने सारवासारव केली. विशेष म्हणजे, हा प्रकार कसा खोटा हे दाखविण्यासाठी त्यांनी मुलींना धमकावले. तसेच, आम्हाला लैगिकतेविषयी माहिती द्या, असे आम्हीच शिक्षकाला विचारले होते, असे त्यांच्याकडून लिहून घेतले. मुलींकडून असे लिहून घेतल्याचे समजल्यानंतर पालक काहीसे बॅकफुटवर गेले. शिक्षकावर कारवाई न झाल्यास मुलींना त्रास होईल, या भीतीपोटी त्यांनी तक्रार देण्यास नकार दिला.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
