कामाची बातमी! शासनाच्या ‘आपले सरकार’ पोर्टलवर  नागरिकांसाठी उपलब्ध होणार १०२७ ऑनलाइन सेवा; जो विभाग अयशस्वी ठरेल त्याला दरदिवशी भरावा लागेल १००० रुपये दंड

मंगळवेढा टाईम्स न्युज नेटवर्क ।

शासन-प्रशासन व नागरिकांमधील विश्वास वृद्धिंगत होण्यासाठी राबवलेल्या १०० दिवसांच्या कार्यक्रम अंतर्गत कार्यालयीन मोहिमेच्या पहिल्या टप्प्यात सामान्य प्रशासन (सेवा) विभागाने केवळ २४ टक्के उद्दिष्टे पूर्ण केली. मूल्यांकनात सर्वात खालच्या ४८ व्या क्रमांकावर सामान्य प्रशासन आहे.

यामुळेच आता मुख्यमंत्री देवेंद्र फडणवीस यांनी या विभागाबाबत कठोर निर्णय घेतला आहे. मुख्यमंत्र्यांनी ‘आपले सरकार’ पोर्टलवर महाराष्ट्र लोकसेवा हक्क अधिनियमात अधिसूचित सर्व ऑनलाइन सेवा न देणाऱ्या अधिकाऱ्यांवर दंडात्मक कारवाई करण्याचे आदेश दिले आहेत.

सामान्य प्रशासन विभागाने याबाबत महत्त्वपूर्ण शासन आदेश जारी केला आहे. महाराष्ट्र लोकसेवा हक्क अधिनियम, २०१५ या अधिनियमांतर्गत एकूण १०२७सेवा अधिसूचित करण्यात आल्या आहेत. त्यापैकी फक्त १३८ सेवा सद्यःस्थितीत विभागांच्या पोर्टलवर ऑनलाइन उपलब्ध आहेत,

मात्र ‘आपले सरकार’ पोर्टलवर उपलब्ध नाहीत. अशा सर्व सेवा ३१ मे २०२५ पूर्वी ‘आपले सरकार’ पोर्टलवर उपलब्ध करून देण्यात याव्यात. राज्य सरकारने अशा परिपत्रक जारी केले आहे.

सद्यःस्थितीत ऑफलाइन उपलब्ध असलेल्या विभागांच्या ३०६ सेवा ‘आपले सरकार’ पोर्टलवर १५ ऑगस्ट २०२५ पूर्वी उपलब्ध करून देण्यात याव्यात.

त्याचप्रमाणे, मंत्रालयीन विभागांनी त्यांच्या व त्यांच्या अधिनस्त असलेल्या सर्व क्षेत्रीय कार्यालये, मंडळे, महामंडळे, प्राधिकरणे, कंपन्या, स्थानिक स्वराज्य संस्था, शासकीय संस्था, विद्यापीठे इ. च्या सर्व सेवा अधिसूचित करण्याची कार्यवाही एक महिन्यात पूर्ण करावी.

यानंतर अशा अधिसूचित केलेल्या सर्व सेवा १५ सप्टेंबर २०२५ पूर्वी ‘आपले सरकार’ पोर्टलवर ऑनलाइन उपलब्ध करून द्याव्यात. जे विभाग सेवा ऑनलाइन करण्यास अयशस्वी ठरतील त्यांना निर्धारित कालमयदिनंतर संबंधित सेवांसाठी जबाबदार असणाऱ्या विभागप्रमुख किंवा कार्यालय प्रमुख यांच्या वेतनातून प्रति सेवा प्रति दिन १००० रुपये दंड आकारण्यात येईल.

डॅशबोर्ड उपलब्ध करण्याची जबाबदारी महाआयटीवर

सर्व संबंधित विभागांनी माहिती व तंत्रज्ञान विभागाच्या साहाय्याने मुदतीत सर्व सेवा ऑनलाइन उपलब्ध करून देण्याबाबत कार्यवाही करावी. महा-आयटीने सर्व सेवा ऑनलाइन विकसित करण्यासाठी विभागांना कोणतेही शुल्क न आकारता मोफत साहाव्य उपलब्ध करून द्यावे.

त्यासाठी विभागांच्या सर्व सेवा ऑनलाइन पध्दतीने ‘आपले सरकार’ पोर्टलवर उपलब्ध करून देण्याची व सर्व विभागांना ऑनलाईन सेवांचा डॅशबोर्ड उपलब्ध करून देण्याची जबाबदारी महा-आयटीवर सोपवण्यात येत आहे. सामान्य प्रशासन विभागाने परिपत्रकात असा आदेश दिला आहे.

अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262

“मंगळवेढा टाईम्स“च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.

मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स

बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.

बातम्या सर्वप्रथम जाणून घेण्याकरिता लाईक करा आमचे फेसबुक पेज