टीम मंगळवेढा टाईम्स ।
मंगळवेढा तालुक्यातील भोसे ग्रामपंचायत निवडणुकीच्या आखाड्यात तब्बल 14 उमेदवारांचे अर्ज विविध हरकती घेत अपात्र करण्यात आले. हरकतीसाठी जोडलेल्या बनावट दाखल्यांवरून गुन्हा दाखल करण्याचे आदेश तहसीलदारांकडून देण्यात आले.
दरम्यान, गुन्हा कुणावर दाखल करावा, त्यांची नावे द्यावी, अशी मागणी ग्रामसेवकांनी केल्यामुळे मात्र खळबळ उडाली आहे.भोसे ग्रामपंचायत निवडणुकीच्या अर्ज छाननीच्या वेळी पाच प्रभागांतील प्रभाग एकमध्ये तीन, दोनमध्ये चार, प्रभाग तीनमध्ये एक, प्रभाग चारमध्ये चार आणि प्रभाग पाचमधील सहा इतक्‍या उमेदवारांच्या अर्जांना हरकती घेण्यात आल्या.
त्यामध्ये त्या उमेदवारांकडे शौचालय नाही व काही उमेदवारांनी ग्रामपंचायतीकडे ठेकेदारी स्वरूपाचे काम केल्याचे पुरावे म्हणून ग्रामसेवकांचे दाखले जोडण्यात आले.
परंतु “त्या’ दाखल्यांबाबत या ग्रामपंचायतीकडे दोन ग्रामसेवकांनी कामकाज केल्याने हरकतीसाठी घेतलेले दाखले नेमके कुणाच्या सहीचे आहेत, हा प्रश्न अपात्र उमेदवारांना छाननीदरम्यान पडला होता.
प्रभारी ग्रामसेवकाने आपण ते दाखले दिलेले नाहीत, असे लेखी दिले. त्यानंतर हे प्रकरण न्यायप्रविष्ठ झाले. सदरची याचिका निकाली निघाली. दरम्यान, बनावट दाखल्यांप्रकरणी गुन्हा दाखल करण्याचे आदेश तहसीलदार स्वप्नील रावडे यांनी गटविकास अधिकारी यांना 21 जानेवारीला दिले.
तत्कालीन प्रभारी ग्रामसेवक दत्तात्रय इंगवले यांना सदर दाखल्यांप्रकरणी गुन्हा दाखल करून त्याचा अहवाल सादर करण्याच्या सूचना दिल्या. परंतु यामध्ये इंगोले यांनी गुन्हा दाखल करण्यास टाळाटाळ केल्यामुळे त्यांना कारणे दाखवा नोटीस बजावली होती.
दरम्यान, या नोटिशीत ग्रामसेवकांनी आपणास भोसे ग्रामपंचायतीचा पदभार 28 डिसेंबर रोजी सायंकाळी चार वाजता दिला, त्याच कालावधीत मुढवी ग्रामपंचायत निवडणूक असल्यामुळे सदर ग्रामपंचायतीचा पदभार घेतला नाही, त्यामुळे भोसे ग्रामपंचायतीचा कारभार पाहण्याचा प्रश्नच उद्भवला नाही.
सदर ग्रामपंचायतीचा पदभार न देताच तो एक दिवसात काढून घेण्यात आला, त्यामुळे सदर प्रकरणी कोणावर फिर्याद दाखल करावी, त्यांची नावे द्यावीत; शिवाय कोणत्या कारणास्तव उमेदवारांचे अर्ज फेटाळले याची माहिती विचारण्यासाठी तहसील कार्यालयात गेलो असता, प्रशासकीय कामकाज सुरू आहे,
तुम्ही बाहेर जा, असे सांगण्यात आले. त्यामुळे याबाबतची माहिती मिळू शकली नाही, असा खुलासा ग्रामसेवकाने गटविकास अधिकारी यांना केला.(सकाळ)
संधी दिली नाही….
निवडणुकी दरम्यान निवडणूक निर्णय अधिकारी बंडू खेताडे यांच्या हरकतीवर म्हणणे सादर करण्यास संधी दिली नाही.बनावट दाखल्यांप्रकरणी गुन्हा दाखल करण्याचे आदेश होऊनही सरपंच निवडीपर्यंत कोणावरही गुन्हा दाखल करायचा नसल्याच्या कारणास्तव तहसील व पंचायत समितीकडून टोलवाटोलवी केली जात आहे– कर्मवीर आवताडे,अर्ज अपात्र ठरविण्यात आलेले उमेदवार,भोसे
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
