टीम मंगळवेढा टाईम्स ।
भारत देशाच्या स्वातंत्र्य महोत्सवानिमित्त सोलापूर जिल्ह्यातील सहा लाख घरे व आस्थापनांवर तिरंगा झेंडा (राष्ट्रध्वज) फडकविण्याचे नियोजन करण्यात आले आहे.
‘हर घर झेंडा’ या उपक्रमातंर्गत जिल्ह्यात दि.१३ ते १५ ऑगस्टदरम्यान तिरंगा ध्वज लावण्यात येणार आहे.
दि.९ ते १७ ऑगस्टपर्यंत विविध कार्यक्रमांचे आयोजन करण्यात आले आहे, अशी माहिती जिल्हाधिकारी मिलिंद शंभरकर यांनी दिली.
स्वातंत्र्याचा अमृत महोत्सवी वर्षानिमित्त ९ ऑगस्टला जिल्हास्तरावर आणि तालुक्याच्या ठिकाणी संविधान स्तंभाची उभारणी, सर्व शासकीय कार्यालयांची स्वच्छता, महत्वाचे वारसा स्थळांची देखभाल करून ऐतिहासिक वारसा जपणूक करणे,
महाविद्यालये कलापथक आणि पथनाट्य यांचे कार्यक्रम सर्व मंडळाच्या ठिकाणी होणार आहेत.
जिल्हा, तालुका मुख्यालय प्रमुख गावांच्या रस्त्यांच्या कडेला अनाम वीर, हुतात्मे यांच्या कार्याची माहिती लावण्यात येणार आहे.
जिल्हा, तालुक्याच्या स्वातंत्र्यकालीन ऐतिहासिक माहितीचे डिजीटल फ्लेक्स तयार करून लावण्यात येणार आहेत.
पुरातत्वदृष्टया महत्वाच्या वारसा स्थळांची स्वच्छता , प्रत्येक शासकीय कार्यालयांची स्वच्छता करण्यात येणार आहे.
दि.१२ ते १४ ऑगस्ट दरम्यान विद्यापीठस्तरावर कार्यशाळा, चर्चासत्रे , जाणीव जागृतीबाबत विविध स्पर्धा घेण्यात येणार आहेत.
दि.१२ ऑगस्टला सायक्लोथॉन , १४ ऑगस्टला मॅरेथॉनचे आयोजन करण्यात आले आहे. १० ते १२ ऑगस्ट रोजी शाळा, महाविद्यालयात अनुक्रमे निबंध , वक्तृत्व, चित्रकला स्पर्धांचे आयोजन करण्यात आले आहे.
१२ ऑगस्टला सर्व शासकीय कार्यालय आवारात वृक्षारोपण करण्यात येणार आहे. १५ ऑगस्टला स्वातंत्र्यदिनी एनसीसी, एनएसएस पथकांसोबत विद्यार्थ्यांची प्रभात फेरी काढण्यात येणार आहे, असेही त्यांनी सांगितले.
जिल्हाभरात विक्रीसाठी स्टॉल्स
‘हर घर झेंडा’ या उपक्रमातंर्गत जिल्हावासीयांनी आपापल्या घरांवर दि.१३ ते १४ ऑगस्ट दरम्यान तिरंगा झेंडा लावण्याचे आवाहन करण्यात आले आहे. नागरिकांना राष्ट्रध्वज उपलब्ध व्हावेत.
यासाठी जिल्हाधिकारी कार्यालय , सर्व तहसिल कार्यालये आणि नगरपालिकांच्या कार्यालय हद्दीत स्टॉल्स लावण्यात येणार आहे. शासनाकडून झेंडे येणार असून प्रति झेंड्यास २१ रुपयांचा दर आकारला जाणार आहे. येत्या ८ ऑगस्टपासून विक्री स्टॉल सुरु करण्यात येणार आहेत असे निवासी उपजिल्हाधिकारी शमा पवार यांनी सांगितले.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
