राज्यात विधानपरिषदेच्या शिक्षक व पदवीधर मतदार संघातील रिक्त झालेल्या 5 जागांसाठी केंद्रिय निवडणूक आयोगाने आज वेळापत्रक जाहीर केले आहे. औरंगाबाद, पुणे, नागपूर येथील पदवीधर व अमरावती आणि पुणे येथील शिक्षक मतदारसंघासाठी विधान परिषदेची ही निवडणूक होत आहे.
या निवडणुकीची अधिसूचना 5 नोव्हेंबरला प्रसिद्ध होणार आहे. 12 नोव्हेंबर पर्यंत अर्ज स्वीकृती होणार आहे. प्राप्त अर्जांची छाननी 13 नोव्हेंबरला तर 17 नोव्हेंबरला अर्ज माघार घेण्याची मुदत देण्यात आली आहे. या पाचही जागांसाठी 1 डिसेंबरला सकाळी आठ ते सायंकाळी पाच या वेळेत मतदान होणार आहे.
दि.3 डिसेंबर रोजी या पाचही जागांसाठी मतमोजणी होणार आहे.औरंगाबाद पदवीधर मतदार संघाचे आमदार सतीश चव्हाण, नागपूर पदवीधरचे आमदार अनिल सोले, अमरावती शिक्षक मतदारसंघाचे आमदार श्रीकांत देशपांडे आणि पुणे शिक्षक मतदार संघाचे आमदार दत्तात्रय सावंत यांच्या सदस्यत्वाची मुदत संपल्याने या जागा रिक्त झाल्या आहेत.
पुणे पदवीधर मतदारसंघाचे तत्कालिन आमदार भाजपचे प्रदेशाध्यक्ष चंद्रकांतदादा पाटील यांची पुण्यातील कोथरूड मतदारसंघातून विधानसभेत निवड झाल्याने ही जागा रिक्त झाली आहे.
औरंगाबाद, नागपूर आणि पुणे पदवीधर मतदार संघ तर अमरावती आणि पुणे शिक्षक मतदार संघ यासाठी ही निवडणूक होईल.
राज्यातील अनेक स्थानिक स्वराज्य संस्थांमध्ये भाजपने आपला झेंडा फडकावल्यामुळे विधानपरिषदेत भाजपचं वजन वाढलं आहे.
मात्र आता शिवसेना, राष्ट्रवादी आणि काँग्रेस हे तीन पक्ष एकत्र आले असल्याने पुन्हा समीकरण बदललं जाण्याची शक्यता आहे. त्यामुळे या निवडणुकीत कोण बाजी मारतं, याकडे सर्वांचं लक्ष लागलं आहे.
दुसरीकडे, गेल्या काही दिवसांपासून राज्यपाल नियुक्त विधानपरिषदेच्या 12 जागांबाबत कुणाला संधी मिळते, याबाबत अद्याप स्पष्टता नाही.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
