टीम मंगळवेढा टाईम्स ।
सोलापूर जिल्हा आपल्या ताब्यातून जात असल्याचे बारामतीकरांच्या लक्षात आले आहे. सत्तेमुळे परिस्थिती सुधारेल, असे वाटत असताना सत्ता गेली. त्यामुळे बारामतीकरांचे दौरे वाढले आहेत.
मागील १५ दिवसांपूर्वी शरद पवार जिल्ह्यात आले. शिंदे बंधूंना बळ देत माढा अन् करमाळा ताब्यात राहील , याचा प्रयत्न केला.
त्यानंतर, चार-आठ दिवसांनंतर आमदार रोहित पवार हेही पंढरपूरला आले. तेही पंढरीतील नेत्यांना भेटले. त्यानंतर, काल खा.सुप्रिया सुळे जिल्ह्याच्या दौऱ्यावर होते.
सोलापूर , मंगळवेढा , पंढरपूर , सांगोला तालुक्यातील अनेकांना भेटून त्या बारामती गाठल्या. गेल्या १५ दिवसांत काक , दादा आणि ताई असे तिघेही सोलापूर जिल्ह्यावर लक्ष केंद्रीय केले आहेत.
भाजपला शह देत , आपली पकड मजबूत करण्याचा प्रयत्न सुरू केल्याची चर्चा रंगली आहे.
संतांच्या दर्शनासाठी सुप्रिया सुळे यांचा राष्ट्रवादीच्या पदाधिकाऱ्यांना चकवा
राहुल शहा यांच्या निवासस्थानी भेट दिल्यानंतर सुप्रिया सुळे यांनी संत चोखामेळा समाधीचे दर्शन घेतले. त्यानंतर ५२ वर्षांची परंपरा असलेल्या जय भवानी नवरात्र महोत्सव मंडळाच्या देवीचे दर्शन घेतले.
या दौऱ्यातील गर्दी पाहून त्यांनी कार्यकर्त्यांना चकवा दिला. गर्दी टाळण्यासाठी गाडी चालू करून त्यापुढे गेल्या. थोडे पुढे गेल्यानंतर त्या पुन्हा परत आल्या. त्यानंतर त्यांनी या भागाचे अभ्यासक आणि कवि इंद्रजित घुले यांना सोबत घेऊन परिसराची माहिती घेतली.
खासदार सुप्रिया सुळे म्हणाल्या की, मंगळवेढ्यातील संतनगरीचा इतिहास मोठा आहे. हा इतिहास नवीन पिढीला समजून घेण्यासाठी सर्व नागरिकांच्या पुढाकारातून मास्टर प्लॅनची आवश्यकता आहे, त्यासाठी काही तज्ज्ञांशी बोलणार आहे.
तसेच, संत चोखोबा स्मारकाच्या संदर्भात जिल्हाधिकाऱ्यांशी बोलणार असल्याचे त्यांनी सांगितले. संत नगरीत भाविकांची संख्या वाढविण्याच्या दृष्टीने प्रलंबित असलेला पंढरपूर-विजयपूर या रेल्वेमार्गाच्या प्रश्नासंदर्भात त्या म्हणाल्या की, संसदेच्या आगामी अधिवेशनात हा प्रश्न उपस्थित करणार आहे.
खासदार सुळे यांनी मंगळवेढ्यातील नागरिकांशी संवाद साधला. दरम्यान, शहरात लावलेल्या डिजिटल फलकावरून राष्ट्रवादीचे प्रवक्ते उमेश पाटील व इथल्या स्थानिक पदाधिकाऱ्यांशी वादावादी झाली.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज