मोठी बातमी! उजनीतून भीमा नदीत सोडलेल्या पाण्यामुळे मंगळवेढा तालुक्यात पूरस्थिती; ‘या’ मार्गावर पाणी आल्याने वाहतूक बंद

टीम मंगळवेढा टाईम्स ।

भीमा नदी पात्रात उजनी धरणातून अतिरिक्त झालेले पाणी सोडल्याने भीमा दुथडी भरून वाहत असून नदी काठावरील शेतीमध्ये पाणी शिरल्याचे चित्र आहे. दरम्यान, हे पाणी तामदर्डी-रहाटेवाडी मार्गावर आल्याने येथील वाहतूक पूर्णतः बंद झाली असल्याचे ग्रामस्थांकडून सांगण्यात आले.

पुणे व सातारा जिल्ह्यात मोठ्या प्रमाणात पाऊस पडल्याने तेथील धरणे ओव्हरफुल्ल झाली असल्याने अतिरिक्त पाणी उजनी धरणातून भीमा नदीच्या पात्रात सोडण्यात येत असल्याने

यंदा श्रावण महिन्यात भीमा नदीला दोन वेळा पूरसदृश परिस्थिती निर्माण झाली आहे. भीमा नदी पात्रातील उचेठाण, माचणूर, सिद्धापूर आदी को. प. बंधारे पाण्याखाली गेले आहेत.

तीर्थक्षेत्र माचणूर येथील भीमा नदी पात्रातील जटाशंकर मंदिरही पाण्याखाली गेले असून येथे श्रावण मासानिमित्त भाविकांची दर्शनासाठी गर्दी होत आहे. पुराचा धोका ओळखून नदीकडील घाटावरील असलेला मंदिराचा दरवाजा बंद करण्यात आला आहे.

नदी पात्रातील पाणी पातळीत वाढ झाल्यास ब्रह्मपुरी-बठाण या मार्गावर बेलीचा ओढा येथे पाणी येण्याची शक्यता वर्तविली जात आहे.

नदी काठावरील बागायत क्षेत्रामध्ये हे पुराचे पाणी घुसून भुसार व उसासारखी पिके पाण्यात गेली असल्याचे शेतकरी वर्गाकडून सांगण्यात येत आहे.

भीमा नदीचा महापूर पाहण्यासाठी माचणूर येथील राष्ट्रीय महामार्गावरील पुलावर नागरिक गर्दी करीत असल्याचे चित्र असून येथे पाण्यासोबत सेल्फी काढण्याची स्पर्धा लागल्याचे दिसून येत आहे.

राज्यातील व देशातील ब्रेकिंग बातम्या आणि माहिती सर्वात प्रथम तुमच्या पर्यंत .आजच Add करा तुमच्या Whatsapp ग्रुपवर 99 70 76 6262 हा आमचा नंबर.