टीम मंगळवेढा टाईम्स ।
दखलपात्र गुन्हा दाखल न करणाऱ्या पोलीस अधिकाऱ्याविरुद्ध कर्तव्यात कसूर केल्याबद्दल न्यायालयाच्या आदेशानुसार तत्कालीन पोलीस निरीक्षक के.एन.पाटील यांच्या विरुद्ध टेंभुर्णी पोलीस ठाण्यात गुन्हा दाखल करण्यात आला आहे.
याबाबतचे वृत्त असे की, सेवानिवृत्त पोलीस उपाधीक्षक काशिनाथ सौदागर तळेकर यांची टेंभुर्णी येथे असणाऱ्या जमिनी मध्ये अनधिकृतपणे जेसीबीच्या साह्याने येथील शिवाजी केदार (अरण) यांनी पाच हजार रुपयाचे नुकसान केलेचा अर्ज १०/१०/२००९ रोजी तक्रारी अर्ज टेंभुर्णी पोलीस स्टेशनला देण्यात आला होता.
तत्कालीन प्रभारी पोलीस स्टेशन अधिकारी धनंजय जाधव यांनी दखलपात्र गुन्हा नोंद करणे बंधनकारक असताना अर्जदाराच्या खबरी वरून गुन्हा नोंद केला नाही. यानंतर तळेकर यांनी पोलीस अधीक्षक सोलापूर यांच्याकडे जाधव यांच्याविरुद्ध १५ / १० / २००९ रोजी पोलीस अधीक्षक यांच्याकडे तक्रार केली.
पोलीस अधीक्षक यांनी विभागीय पोलीस अधिकारी करमाळा यांच्याकडे गुन्हा नोंद करणे बाबत आदेश दिले. त्यानुसार चौकशी करून विभागीय पोलीस अधिकारी बंडगर यांनी सदर आरोपी विरुद्ध दखलपात्र गुन्हा नोंद केला.
सहाय्यक पोलीस निरीक्षक धनंजय जाधव यांनी दखलपात्र गुन्हा दाखल करून आरोपीला शिक्षेपासून वाचण्यासाठी बनावट नोंद अर्ज रजिस्टरमध्ये केली. त्यामुळे क्रिमिनल प्रोसीजर कोड कलम १५४/१ मधील तरतुदीचा भंग केला म्हणून धनंजय जाधव यांच्यावर खातेनिहाय चौकशी करण्याची मागणी तळेकर यांनी पोलिस अधीक्षक सोलापूर यांच्याकडे केली.
त्यावर पोलीस अधीक्षक कार्यालयने धनंजय जाधव यांच्यावरील कारवाईचे कागद उपलब्ध नाहीत, असे कळवले होते. त्यामुळे व्यथित होऊन तळेकर यांनी २० / ४ / २०१५ रोजी सहाय्यक पोलीस निरीक्षक धनंजय जाधव त्यांना सहाय्य करणारे पोलीस उपनिरीक्षक आनंद शिंदे पोलीस हवालदार प्रभाकर पाटील यांच्याविरुद्ध टेंभुर्णी पोलीस स्टेशनचे प्रभारी अधिकारी के.एन.पाटील यांच्याकडे १४५ क प्रमाणे दखलपात्र गुन्ह्यांची खबर दिली होती.
प्रभारी पोलीस अधिकारी पोलीस निरीक्षक के.एन. पाटील यांनी क्रिमिनल प्रोसिजरप्रमाणे दखलपात्र गुन्ह्याचे खबर बुकात गुन्ह्याची नोंद करणे बंधनकारक होते. पण तो त्यांनी दखलपात्र गुन्हा नोंद करण्याचे नाकारले.
यासंदर्भात वेळोवेळी विनंती करूनही गुन्हा नोंद केला नाही. तेव्हा तळेकर यांच्या तक्रारीवरून पोलीस महासंचालक यांनी दखलपात्र गुन्ह्यांच्या खबरीवर तात्काळ गुन्हा नोंद करावा, असे आदेश दिले होते.
परंतु पोलीस निरीक्षक के.एन. पाटील यांनी जाणीवपूर्वक आदेशाचे उल्लंघन केल्याने फिर्यादी तळेकर यांनी माढा न्यायालयात तक्रार दाखल केली. यावरून न्यायालयाने दिलेल्या आदेशावरून तत्कालीन पोलीस निरीक्षक के.एन. पाटील यांच्यावर गुन्हा दाखल करण्यात आला.(स्रोत:पुण्यनगरी)
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
