टीम मंगळवेढा टाइम्स ।
पंढरपूर तालुक्यातील गुरसाळे येथील श्री विठ्ठल सहकारी साखर कारखाना गैरव्यवस्थापनामुळे आर्थिक डबघाईस आला आहे.
या नुकसानीस विद्यमान संचालक मंडळ जबाबदार असल्याबाबतची तक्रार झाली आहे.
याची साखर प्रादेशिक सहसंचालकांनी दखल घेतली असून कारखान्यास झालेल्या आर्थिक नुकसानीची जबाबदारी निश्चित करण्यासाठी विशेष लेखापरीक्षक गौतम निकाळजे यांची नियुक्ती करण्यात आली आहे.
साखर संचालकांच्या चौकशी आदेशामुळे कारखान्याचे अध्यक्ष भगीरथ भालके यांच्यासह संचालक मंडळ अधिक अडचणीत येण्याची शक्यता वर्तवली जात आहे.
सरकोली येथील भोसले रामहरी यांनी याबाबत पुणे येथील साखर आयुक्त व सोलापूर येथील प्रादेशिक सहसंचालकांकडे तक्रार केली आहे. सदर तक्रारीनुसार श्री विठ्ठल साखर कारखाना आर्थिक अडचणीत आला असून यास विद्यमान संचालक मंडळ जबाबदार असल्याचा आरोप करण्यात आला आहे.
संचालक मंडळाने नियमबाह्य कामकाज केल्यामुळे कारखान्यावर कर्ज झाले असल्याचे तक्रारीत नमूद केले आहे. याबाबत सोलापूर येथे तीन वेळा विविध सुनावण्या झाल्या आहेत.
या सुनावणीवेळी सादर करण्यात आलेल्या कागदपत्रांच्या आधारे सहकार कायद्यानुसार कलम ८८ अंतर्गत चौकशी व जबाबदारी निश्चित केली जाणार आहे.
यासाठी प्रादेशिक सहसंचालक राजेंद्र दराडे यांनी कारखान्यास झालेल्या आर्थिक नुकसानीची जबाबदारी निश्चित करण्यासाठी विशेष लेखापरीक्षक निकाळजे यांची प्राधिकृत अधिकारी म्हणून नियुक्ती करण्यात आली असल्याचे पत्र काढले आहे.
सदर अधिकारी याबाबत सविस्तर चौकशी करणार आहेत. हा आदेश १० नोव्हेंबर रोजी काढण्यात आला असून येत्या सहा महिन्यात यावर चौकशी केली जाणार आहे.
साखर सहसंचालक यांच्या आदेशामुळे विद्यमान संचालक यांच्या अडचणीत वाढ होण्याची शक्यता आहे.(स्रोत:सकाळ)
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
