मंगळवेढा टाइम्स न्यूज नेटवर्क ।
सोलापुरातील होटगी रोड विमानतळावरून विमानसेवा करण्यासंदर्भातील हालचालींना आता वेग आला आहे. स्टार एअरलाईन्स कंपनी सोलापुरातून विमानसेवा सुरू करण्यास अनुकूल असून, लवकरच त्यांची दोन विमाने सोलापुरातून सेवा देतील, अशी आशा चेंबर ऑफ कॉमर्सने व्यक्त केली आहे.
दरम्यान, स्टार एअरलाईन्सचे चेअरमन संजय घोडावत यांना सोलापुरातून मुंबई, तिरुपती, दिल्ली, जयपूर व चेन्नई या ठिकाणी विमानसेवा सुरू करावी या मागणीचे निवेदन देण्यात आले.
याचवेळी खा. जयसिद्धेश्वर महास्वामी यांनीही घोडावत यांना विमानसेवा सुरू करण्याविषयी फोनवरून चर्चा केली. या बैठकीत उद्योग वाढीवरही चर्चा करण्यात आली.
सोलापुरातून एअरलाईन्सने विमानसेवा सुरू करावी या मागणीचे निवेदन घोडावत यांना देण्यात आले. यावेळी चेंबर ऑफ कॉमर्सचे अध्यक्ष ललितभाई गांधी, सोलापूर विकास मंचचे केतन शहा व इतर पदाधिकारी उपस्थित होते.
बंगळुरू, हैदराबादसाठी स्पाईस जेट, अलाईन्सला परवानगी
होटगी विमानतळावर बंगळुरू व हैदराबादसाठी स्पाईस जेट व अलाईन्स कंपनीला या अगोदरच उड्डाण योजनेअंतर्गत परवानगी देण्यात आली आहे. उर्वरित मार्गावरही विविध विमान कंपन्यांशी पत्रव्यवहार, चर्चा सुरु असल्याचे सोलापूर विकास मंचचे केतन शहा यांनी सांगितले.
मी स्वतः पायलट असून, ट्रेनिंगसाठी मी बऱ्याच वेळा सोलापूरच्या होटगी रोड विमानतळावर माझे विमान उतरवले आहे. माझी ८० आसनी दोन नवीन विमाने येत आहेत. आमचा बेस बंगळुरू व बेळगावी असून, तेथून व्हाया सोलापूर कशी विमानसेवा सुरू करता येईल, ते मी आमच्या टीमशी चर्चा करून पाहतो. मुंबईला स्लॉट कसा मिळतो ते बघतो. -संजय घोडावत, चेअरमन, स्टार एअरलाईन्स.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
