सावध राहा! पोलिस यंत्रणेची तपासाची चक्रे गतिमान, गावातील हालचालींवर लक्ष ठेवण्याच्या सूचना, ‘यांना’ रात्र गस्तीची सक्ती; डीवायएसपींचे आदेश

टीम मंगळवेढा टाईम्स। 

मंगळवेढा येथील चार वर्षांच्या बालकाच्या अपहरणाच्या पार्श्वभूमीवर मंगळवेढा तालुक्यातील पोलिस यंत्रणा पाच दिवसांपासून तपासकामात व्यस्त आहे.

या घटनेच्या पार्श्वभूमीवर डीवायएसपी राजश्री पाटील यांनी मंगळवेढा व सांगोला तालुक्यांतील सर्व पोलिस पाटलांना सक्त रात्रगस्त घालण्याबाबत लेखी आदेश काढले आहेत.

पोलिस यंत्रणेने सर्व बाजूंनी तपासाची चक्रे गतिमान केली आहेत. पोलीस अधीक्षक शिरीष सरदेशपांडे व अतिरिक्त पोलिस अधीक्षक हिंमतराव जाधव यांनी पोलिस अधिकाऱ्यांना तपासाबाबत योग्य दिशा दिल्या आहेत. नऊ पथकांच्या मदतीने चार दिवसांपासून शोधकार्य सुरू आहे.

दि.२३ ऑक्टोबर रोजी कार्तिकी अमावस्या असल्याने रात्री ८ ते दि.२४ नोव्हेंबर रोजी सकाळी सहापर्यंत सक्त रात्रगस्त घालावी आणि नाईट राउंडबाबत लेखी अहवाल सादर करावा, अशा सक्त सूचना देण्यात आल्या आहेत.

रात्रगस्तीकरिता सोबत गावातील १० सुज्ञ नागरिकांना घ्यावे, सोबत शिट्टी व लाठी ठेवावी. गावातील सर्व प्राचीन करावी. मंदिरे तसेच इतर सर्व मंदिरे रात्रगस्तीदरम्यान चेक करावीत.

गावातील मंत्र व तंत्रविद्या करणारे तसेच देवर्षी या लोकांवर बारकाईने नजर ठेवा. गावात रात्रीच्या वेळी कोणी अनोळखी माणूस मंदिराच्या आसपास दिसल्यास त्याला तत्काळ ताब्यात घेऊन संबंधित पोलिस ठाण्यास माहिती द्यावी.

गावात अनोळखी महिला व पुरुष अंदाजे चार वर्षांच्या मुलासह दिसल्यास खात्री करून त्यांचे फोटो संबंधित पोलिस ठाण्याच्या अथवा आमचे व्हॉटस्अॅप ग्रुपवर टाकावेत.

गावात रात्री उशिराने येणाऱ्या प्रत्येकाच्या नावाची नोंद करून ठेवावी. दिवसा गावातील सर्व विहिरी, ओढे व नाले तसेच अज्ञात ठिकाणे, गायरान जमीन तसेच गावातदेखील पाहणी करावी.

गावात अमावास्येनिमित्त निर्जन ठिकाणी अथवा घरी कोणी देवकार्य आयोजित केले आहे का? असल्यास ते देवकार्य कोणत्या देवाचे, कशाकरिता आहे याची गोपनीय माहिती काढून तत्काळ अधिकाऱ्यांना कळवावी, अशा सूचना पोलिस पाटलांना मंगळवेढ्याच्या डीवायएसपी राजश्री पाटील यांनी केल्या.(स्रोत:लोकमत)

डीवायएसपींच्या सूचना

गावातील स्मशानभूमी चेक करून तेथे कोणी नवीन खड्डे पाडलेत का व पूजा मांडली आहे का, त्याबाबत माहिती काढावी. गावात चार ते पाच दिवसांपूर्वी मूर्तीची स्थापना केली आहे का, याबाबत गोपनीय माहिती काढावी.

गेले चार ते पाच दिवसांपासून गावातील कोणी काही कारण नसताना परगावी गेले आहे काय व तो अमावास्येच्या रात्री आला असल्यास तो कोठे व का गेला होता याची माहिती घ्यावी, अशा सूचना डीवायएसपी राजश्री पाटील यांनी केल्या आहेत.

बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.

बातम्या सर्वप्रथम जाणून घेण्याकरिता लाईक करा आमचे फेसबुक पेज