मंगळवेढा टाईम्स वृत्तसेवा । जनरल नर्सिंग मिडवायफरी सर्टिफिकेट देण्याचे आमिष दाखवून पुणे जिल्ह्यातील सहा जणांना पाच लाखाला फसविल्याची घटना समोर आली आहे. या प्रकरणी बोरामणी मोहोळकर तांडा (ता. दक्षिण सोलापूर) येथील बाळू गणू चव्हाण याच्याविरुद्ध सदर बाजार पोलीस ठाण्यात फसवणुकीचा गुन्हा दाखल झाला आहे. धीरज नंदकिशोर ठाकूर (रा. खडकवासला, एकता विहार, पुणे) यांनी तक्रार दिली आहे.
पुणे येथील स्वारगेट भागात एका कार्यक्रमानिमित्त फिर्यादी धीरज ठाकूर आणि आरोपी बाळू चव्हाण यांची ओळख झाली.
त्यानंतर आरोपीने फिर्यादीच्या पत्नीचे ओटी असिस्टंट सर्टिफिकेट बदलून ओटी नर्सिंग सर्टीफिकीट देण्याचे आमिष दिले. त्यासाठी 40 हजार रुपये घेतले. तसेच बनावट सर्टिफिकेटही आरोपीने फिर्यादीला दिले. या प्रकारानंतर फिर्यादीच्या ओळखीच्या तबस्सुम खान यांना जनरल नर्सिंग मिडवाफरीचे सर्टिफिकेट देण्याकरिता आरोपीने 60 हजार रुपये घेतले. त्यानंतर आरोपीने जनरल नर्सिंग मिडवाफरी सर्टिफिकेटची गरज असलेल्या वंदना दिलीप चव्हाण, मेघा साळुंखे, सुरेखा वाघोले व सूर्यकांत चौरे यांच्याकडून एकूण पाच लाख रुपये घेतले.
त्याबदल्यात त्यांना बनावट सर्टिफिकेट दिले. त्यातील सुजाता पुरी यांनी डिसेंबर 2019 मध्ये त्या सर्टिफिकेटची सत्यता पडताळणीसाठी ऑनलाइन तपासणी केली. त्यावेळी त्यांना ते सर्टिफिकेट दुसऱ्याच व्यक्तीच्या नावे नोंद असल्याचे दिसून आले. त्यांनी याबाबत फिर्यादीला माहिती दिली. त्यामुळे फिर्यादीने त्यांच्या पत्नीच्या नावे असलेल्या सर्टिफिकेटचीही पडताळणी केली. त्यावेळी सर्व सर्टिफिकेट बनावट असल्याचे आढळून आले. दरम्यान, हा गुन्हा वळसंग पोलिस ठाण्याच्या हद्दीत घडल्याने पुढील तपासा वळसंग पोलिस ठाण्याकडे वर्ग करण्यात आला आहे.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
