मंगळवेढा टाईम्स न्युज।
दारूचे व्यसन आणि त्यातून निर्माण होणारा कौटुंबिक कलह किती भयानक वळण घेऊ शकतो, याचा धक्कादायक प्रत्यय पुण्यातील विश्रांतवाडी परिसरात आला आहे. दारू पिण्यासाठी पैसे देण्यास नकार दिल्याच्या रागातून
एका 30 वर्षीय मुलाने स्वतःच्या 48 वर्षीय आईची बेदम मारहाण करून हत्या केल्याची खळबळजनक घटना शनिवारी रात्री शांतीनगर वसाहतीत घडली. याप्रकरणी विश्रांतवाडी पोलिसांनी कारवाई करत आरोपी मुलाला अटक केली आहे.
शांतीनगर वसाहत, विश्रांतवाडी येथे राहणाऱ्या सविता सुरेश हरिभक्त (वय ४८) असे खून झालेल्या दुर्दैवी महिलेचे नाव आहे. याप्रकरणी त्यांचा मुलगा अनिकेत सुरेश हरिभक्त (वय ३०) याला विश्रांतवाडी पोलिसांनी मध्यरात्री ताब्यात घेऊन अटक केली.
पोलिसांनी दिलेल्या माहितीनुसार, सविता हरिभक्त या पती, दोन मुले आणि एका मुलीसह शांतीनगर वसाहतीत राहत होत्या. त्यांचे पती सुरक्षा रक्षक (सिक्युरिटी गार्ड) म्हणून काम करतात, तर लहान मुलगा आणि मुलगीदेखील काम करून कुटुंबाला हातभार लावतात. आरोपी अनिकेत हा विवाहित असून त्याला एक मुलगाही आहे;
मात्र त्याच्या दारूच्या व्यसनामुळे आणि कौटुंबिक वादामुळे त्याची पत्नी व मुलगा त्याच्यासोबत राहत नाहीत. अनिकेत कोणतीही नोकरी किंवा काम करत नव्हता.
दारूच्या पैशांवरून वाद अन् जीवघेणा हल्ला
शनिवारी रात्री अनिकेतने आई सविता यांच्याकडे दारू पिण्यासाठी पैशांची मागणी केली. मात्र, त्याच्या या मागणीला आईने स्पष्ट नकार दिला. यावरून दोघांमध्ये जोरदार भांडण झाले. नकाराने संतापलेल्या अनिकेतने रागाच्या भरात आईला मारहाण करण्यास सुरुवात केली. या बेदम मारहाणीत सविता यांच्या डोक्याला आणि शरीराला गंभीर दुखापत झाल्याने त्या जागीच रक्ताच्या थारोळ्यात कोसळल्या.
उपचारापूर्वीच महिलेचा मृत्यू
घटनेची माहिती मिळताच विश्रांतवाडी पोलीस ठाण्याच्या पथकाने तातडीने घटनास्थळी धाव घेतली. गंभीर जखमी अवस्थेत असलेल्या सविता यांना पोलिसांनी त्वरित जवळच्या रुग्णालयात उपचारासाठी दाखल केले. परंतु, उपचारांपूर्वीच डॉक्टरांनी त्यांना मृत घोषित केले.
गुन्ह्याची कबुली आणि पोलिसांची कारवाई
घटनेनंतर पोलिसांनी आरोपी अनिकेत हरिभक्त याला ताब्यात घेतले. सुरुवातीला तो पोलिसांना गुंगारा देण्याचा प्रयत्न करत होता आणि आईला का मारले याचे कारण सांगत नव्हता. मात्र, पोलिसांनी खाकीचा हिसका दाखवून सखोल चौकशी केल्यानंतर, दारू पिण्यासाठी पैसे न दिल्याच्या रागातूनच आईची हत्या केल्याची कबुली त्याने दिली.
याप्रकरणी विश्रांतवाडी पोलीस ठाण्यात हत्येचा गुन्हा दाखल करण्यात आला असून विश्रांतवाडी पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली या प्रकरणाचा पुढील सखोल तपास सुरू आहे.
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स“च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
