मंगळवेढा टाईम्स न्युज नेटवर्क।
मंगळवेढा बसस्थानकात प्रवाशांची वर्दळ असतानाच एका अज्ञात चोरट्याने महिलेच्या गळ्यातील सोन्याचे गंठण लंपास केल्याची घटना उघडकीस आली आहे.
या प्रकरणी मंगळवेढा पोलीस ठाण्यात गुन्हा दाखल करण्यात आला असून, भरदिवसा घडलेल्या या चोरीच्या प्रकारामुळे प्रवाशांमध्ये भीतीचे वातावरण पसरले आहे.
नेमकी घटना काय?
मिळालेल्या माहितीनुसार, सुरेखा राजेंद्र पुजारी (वय ५३, रा. ब्रम्हपुरी, ता. मंगळवेढा) या महिला काल (दिनांक ३० मार्च २०२६) दुपारी १:३० च्या सुमारास मंगळवेढा बसस्थानकावर होत्या.
त्या ब्रम्हपुरी गावी जाण्यासाठी मंगळवेढा ते अक्कलकोट (बस क्र. MH 40 5036) या बसमध्ये चढत होत्या. बसमध्ये गर्दी असल्याने त्यांना धक्का लागला, याच संधीचा फायदा घेत अज्ञात चोरट्याने त्यांच्या गळ्यातील १५ ग्रॅम वजनाचे, ६० हजार रुपये किमतीचे सोन्याचे गंठण अतिशय शिताफीने चोरून नेले.
पोलिसांकडून तपास सुरू
बसमध्ये चढल्यावर गंठण गळ्यात नसल्याचे लक्षात येताच सुरेखा पुजारी यांनी आरडाओरडा केला,
मात्र तोपर्यंत चोरटा गर्दीचा फायदा घेऊन पसार झाला होता. त्यानंतर त्यांनी मंगळवेढा पोलीस ठाण्यात धाव घेऊन तक्रार दिली. या तक्रारीवरून पोलिसांनी अज्ञात चोरट्याविरुद्ध BNS कलम ३०३(२) अन्वये चोरीचा गुन्हा दाखल केला आहे.
या प्रकरणाचा पुढील तपास मंगळवेढा पोलीस निरीक्षक यांच्या मार्गदर्शनाखाली पोलीस कॉन्स्टेबल कदम हे करत आहेत.
प्रवाशांसाठी सतर्कतेचा इशारा:
गर्दीच्या ठिकाणी चोरट्यांचा सुळसुळाट वाढला आहे. बसमध्ये चढताना किंवा गर्दीच्या ठिकाणी प्रवाशांनी आपल्या दागिन्यांची आणि सामानाची विशेष काळजी घ्यावी, असे आवाहन पोलिसांकडून करण्यात आले आहे.
यापूर्वीही बस स्थानकावर महिलांचे दागिने आणि पर्स चोरीला जाण्याचे अनेक प्रकार घडले आहेत. धक्कादायक बाब म्हणजे, गेल्या वर्षी एका पोलीस पत्नीची पर्स देखील अशाच प्रकारे चोरीला गेली होती, ज्याचा तपास अद्याप लागलेला नाही. जर पोलिसांच्या कुटुंबातील व्यक्तीच सुरक्षित नसतील, तर सर्वसामान्यांचे काय? असा संतप्त सवाल आता नागरिक विचारत आहेत.
गेल्या वर्षभरात बस स्थानक परिसरात झालेल्या एकाही चोरीचा छडा लावण्यात पोलिसांना यश आलेले नाही. चोरट्यांच्या वाढत्या हिंमतीमुळे ‘खाकी वर्दी’चा धाक कमी झाला आहे का? अशी चर्चा आता सर्वत्र रंगू लागली आहे. वारंवार घडणाऱ्या या घटनांमुळे महिला प्रवाशांमध्ये भीतीचे वातावरण असून, पोलीस प्रशासनाने तात्काळ ठोस पावले उचलून या टोळीचा बंदोबस्त करावा, अशी मागणी होत आहे.
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स“च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
