टीम मंगळवेढा टाईम्स ।
पंढरपूर : एक महिन्यापूर्वी दिवंगत आ.भारत भालके यांच्या कारगाडी चालकाला रस्त्यात अडवून तिघांनी लुटले होते. याप्रकरणी पोलिसांनी तिघांना ताब्यात घेतले आहे.
या लूटमार प्रकरणात दोन अल्पवयीन मुलांचा समावेश आहे. दि.१० डिसेंबर रोजी रात्री दीडच्या सुमारास दिवंगत आ. भारत भालके यांच्या कारगाडीचे चालक तुकाराम शिवाजी शिनगारे (वय ३८) हे बडवेचर झोपडपट्टी येथून चालत घरी जात होते.
यावेळी अज्ञात तिघांनी त्यांना अडवले. यावेळी त्यांना दमदाटी करून त्यांच्याकडून मोबाइल आणि पैशांचे पाकीट काढून घेतले व अंधाराचा फायदा घेऊन तिघेही पळून गेले. यानंतर तुकाराम शिनगारे यांनी २४ हजारांचा मोबाइल आणि पॉकेटमधील ३ हजार रुपये असा मुद्देमाल चोरीला गेल्याची तक्रार दिली होती.
यानंतर पोलीस निरीक्षक अरुण पवार,गुन्हे प्रकटीकरण शाखेचे प्रमुख राजेंद्र गाडेकर यांच्या मार्गदर्शनाखाली पोलीस नाईक गणेश पवार यांनी तपास केला.
या प्रकरणी मनोज बाळू वाघमारे (वय १९,रा.कालिकादेवी चौक , पंढरपूर) व बत्तीस खोल्या (संतपेठ , पंढरपूर) येथील अल्पवयीन दोन मुलांना ताब्यात घेण्यात आले आहे.
दरम्यान, मनोज बाळू वाघमारे याला पंढरपूर येथील न्यायालयात हजर केले असता एक दिवसाची पोलीस कोठडी मिळाली असल्याची माहिती पोलीस निरीक्षक अरुण पवार यांनी दिली.(लोकमत)
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
