मंगळवेढा टाईम्स वृत्तसेवा । करोनाबाधितांमध्ये महाराष्ट्र देशात पहिल्या क्रमांकावर असतानाही राज्यातील नागरिकांना त्याविषयी अजिबात गांभीर्य नसल्याचे स्पष्ट होत आहे. करोनाच्या संकटात जीव धोक्यात घालून सेवा बजावणाऱ्या पोलिसांवर राज्यात आत्तापर्यंत ७६ ठिकाणी हल्ले झाले आहेत. मुंबईतही चार गुन्ह्यांची नोंद करण्यात आली असून शुक्रवारी नाकाबंदी दरम्यान दुचाकीवरील तिघांनी एका सहायक फौजदाराला लाथेने उडविले. ही घटना गोरेगावच्या बांगूरनगरमध्ये घडली असून जखमी पोलिसाला रुग्णालयात दाखल करण्यात आले आहे.
करोनाचा वाढता संसर्ग टाळण्यासाठी देशभरात लॉकडाऊन करण्यात आले आहे. संचारबंदी, जमावबंदी असतानाही नागरिक विनाकारण घराबाहेर पडत आहेत. अशा लोकांना घरात रोखण्यासाठी पोलिस सर्वोतोपरी प्रयत्न करीत आहेत. या प्रयत्नांना लोक गांभीर्याने घेत नसल्याने अखेर पोलिसांनी कारवाईचा बडगा उगारण्यास सुरुवात केली आहे. ठिकठिकाणी संचलन करण्यात येत असून विनाकारण घराबाहेर पडून लॉकडाऊनचे उल्लंघन करणाऱ्यांवर कारवाईसाठी नाकाबंदी लावण्यात येत आहे. असे असले तरी अनेकजण नाकाबंदीलाही जुमानत नसल्याचे समोर आले आहे. राज्यभरात आत्तापर्यंत ७६ ठिकाणी पोलिसांवर हल्ला झाल्याच्या घटना समोर आल्या आहेत. पोलिसांना विरोध आणि धक्काबुकी केल्याप्रकरणी सर्वाधिक ६ गुन्हे लातूरमध्ये दाखल झाले आहेत. त्यापाठोपाठ उस्मानाबाद, बीड आणि मुंबईत प्रत्येकी चार तर नागपूर, पालघर, पुणे ग्रामीण, सातारा, सोलापूर ग्रामीण, जालना आणि बुलढाणा या ठिकाणी प्रत्येकी तीन गुन्ह्यांची नोंद करण्यात आली आहे.
मुंबईमध्ये जे.जे. मार्ग, डोंगरी, धारावीनंतर आता गोरेगावच्या बांगूरनगरमध्ये पोलिसावर हल्ला झाल्याची घटना समोर आली आहे. बांगूरनगर पोलिसांच्या वतीने शुक्रवारी सायंकाळी गोरेगाव पश्चिमेकडील लिंक रोड परिसरातील साठे चौकात नाकाबंदी लावण्यात आली होती. एका दुचाकीवर तीन तरुण येत असून त्यांनी हेल्मेट घातले नव्हते. करोनाचा संसर्ग सुरू असताना मास्कही लावले नव्हते. नाकाबंदीमध्ये असलेले सहायक फौजदार उत्तम राऊत यांनी दुचाकीस्वाराला थांबण्याचा इशारा केला. मात्र, दुचाकीस्वाराने थांबण्याचा बहाणा करून वेग कमी केला आणि राऊत यांच्याजवळ येताच मागे बसलेल्या तरुणाने त्यांना लाथेने उडविले. यानंतर हे तिघेही पळून गेले. मात्र, नाकाबंदीच्या ठिकाणी असलेल्या पोलिसांनी या तिघांना पाठलाग करून पकडले. या घटनेत उत्तम राऊत यांच्या डोळ्याशेजारी, तोंडाच्या आतील भागात जखम झाली असून हातालाही मार लागला आहे. सिटीस्कॅन केले असता त्यांच्या जबड्याचे हाड फ्रॅक्चर असून त्यांना रुग्णालयात दाखल करण्यात आले आहे. राऊत यांची प्रकृती स्थिर असून दुचाकीवरील तिघांना अटक करण्यात आल्याचे बांगूरनगर पोलिसांनी सांगितले.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
